Shillong, K’Lyngkot 25
Ka Voice of the People Party (VPP) ka la pynlong biang sa shisien ïa ka jingïalang ban pynsngewthuh bad pynshai paidbah ha Mawkhar YMCA ha kaba ïadei bad ka jingdawa jong ka seng na ka sorkar jylla ban sangeh ka jingtuklar ha kaba ïadei bad ka rukom treikam jong ka Lokayukta bad ruh ban thungkam biang ïa ki 3 ngut ki ophisar kiba lah shah wengkam.
Ha katei ka jingïalang la ïoh ïa ka jingkren pynshai na u President rangbah ka seng, u Bah Ardent Miller Basaïawmoit, u nongmihkhmat ka North Shillong Konstitwensi, u Bah Adelbert Nongrum, u General Secretary ka seng, u Dr. Ricky AJ Syngkon, u nongmihkhmat ka Mawlai Konstitwensi, u Bah Brightstarwell Marbaniang nalor kiwei kiwei ki dkhot bad ki nongïalam ka seng.
Haba ai jingkren ha katei ka jingïalang, u Dr. Ricky AJ Syngkon u la ong ba u Bah Ardent u long u rangbah uba don ïa ka jingïohi jngai, bad ha u snem 2010 u la kren shaphang ka synshar ka khadar kaba khuid ba suba. Hynrei kaba sngewsih pat ka long ba naduh u snem 2010, u Bah Ardent u long kum uto u briew uba ju pyrta ha ri khlaw ha kaba ym don mano-mano kiba sngap ne kiba salia hynrei kum u nongïalam bashisha, u Bah Ardent u Blei u la batskhem ïa u haduh kane ka khyllipmat kaba mynta.
U Bah Ricky u la ong ba watla u long u briew u bym ju don ha ka jylli jong ka saiñ hima-sima lait noh sa tang ha ka kam hikai hapoh ka skulbah North Eastern Hills University (NEHU) bad ha ka jingshakri ïa ka kam ka jong u kynrad. Hynrei ka dei ha u snem 2020 ki la shong bad khot ïa ki katto katne ban shong pyrkhat ha ka ban thaw noh ïa ka seng VPP ka ban long ka seng ka ban trei na ka bynta ki paidbah bad ban rat dyngkhong ïa ki jingbamsap bad ki jingsynshar bym hok jong ka sorkar.
U la ong ba naduh u snem 2018 ter-ter shakhmat, ka jylla ka la bat ïa ka kyrdan kaba shapoh ha ka liang jong ka pule ka puthi, ka koit ka khiah, ka rep ka riang, ka khuid ka suba.
“Kata ka dei ka jingshisha kaba la paw tyngkreiñ hakhmat jong ka Ri India ïa ka jinglong-jingman jong kane ka jylla kaba ieid ka jong ngi,” la ong u Bah Ricky.
U la ong ba yn sngewsarong aïu ïa ka jylla kaba mynshwa kaba la bna nam kylleng-kylleng hynrei hadien 50 tylli ki snem, ha ka jaka ba kan dang kiew na kawei ka kyrdan sha kawei ka kyrdan pynban ka dang hiar shaduh sha trai.
“Kawei na ki dawbah ba ka hiar ka jylla katne ka long haba ngi pynlong dewthala ïa ka synshar ka khadar”, la ong u Bah Syngkon.
Shuh shuh u Bah Syngkon u la ong ba ïa kaba jakhlia kaba donkam ka long ban pynkhuid ïa ka, hynrei ym lah pat ban pynkhuid ïa ka jakhlia da kaba jakhlia bad kumta donkam da kaei-kaei kaba khuid ban pynkhuid ïa kaba jakhlia.
U la ong ka jylla ka la ïaid lynti la 50 snem tam, hynrei kam tip shaei ba ka ïaid namar ba ym shym la don ba kren ne ba ïohi ïa ka 30-40 snem jong ka jylla. Kumta ka jingmih shakhmat jong ka seng ka mih ryngkat da ka jingïohi jngai kaba ka seng ka don bad ka jingïohi jngai jong ka seng ka long ban pynim pat, ban pynbha pat bad ban pynkylla dur ïa ka jylla na ka bynta jong ki khun ki ksiew.
“Ban pynurlong ïa ka jingthmu jong ngi, ngi don ïa ka thong lane ki nongrim bad kawei na ki nongrim kaba ngi don ka long ïa kaba ngin wanrah ïa ka synshar ka khadar kaba beit bad kaba khuid namar lada kam don ka synshar ka khadar kaba beit bad kaba khuid, kam don jingmut ba ka seng jong ngi kan mih shakhmat”, la ong u Bah Syngkon.
U la ong ba ka seng kam kwah ban mih sha surok hynrei ka jingwengkam jong ka sorkar ïa ki 3 ngut ki ophisar kiba ïeng ban ïaleh pyrshah ïa ka jingbamsap ka la pynlong ïa ka seng ba kam banse ban mih shakhmat halor kane bad ki nongrim kiba ka sorkar ka la wengkam ïa kitei ki ophisar ruh ki long ki bym don nongrim eiei.
“Ngim banse ba ngin hap leit sha u paidbah namar ka bor ha ka synshar paidbah kam dei ha kita kiba shong ha ki shuki, dei u paidbah uba la jied ïa ki ban pynshong ha ki shuki ba kin synshar hok bad leh hok na ka bynta ka bha ka miat jong nga bad jong phi hynrei lada kim leh kumta, ka dei hok ban leit sha u paidbah bad hadien ka jingmih jong u paidbah, ka sorkar ka hap ban pyndem”, la ong u Bah Syngkon.
