Shillong, K’Lyngkot 25
Hadien ka jingkhlad noh jong kawei ka samla kaba dang 23 snem ka rta kaba don hapdeng ka jingshah sumar ha North Eastern Indira Gandhi Regional Institute of Health and Medical Sciences (NEIGRIHMS) ha kaba la kynnoh ba ka don ka jingleh torti, na ka liang ka Sorkar Jylla ka la bthah ïa ka NEIGRIHMS ban aiti ïa ka kaiphod halor kane ka jingjia.
La pyntip ïa kane da ka Myntri ka tnat ka koit ka khiah ka jylla ka Kong Ampareen Lyngdoh, kaba la phah ruh ïa ka khubor sngewlem sha ka ïing ka sem jong katei ka samla.
Ka Kong Ampareen ka la ong, “Ngam kwah ba ngan bakla ha ka jingkren jong nga namar ïa kane nga la pan da ka kaiphod na ki bor pynïaid jong ka NEIGRIHMS.”
Shuh shuh ka Myntri ka la ong, “Wat la ka NEIGRIHMS ka dei ka hospital ka Sorkar Pdeng hynrei ka dei ka kamram jong ka Sorkar Jylla ban long ki shkor bad ki khmat bad lada jia kum kine ki jingjia ba sngewsih, ka Sorkar Jylla kan hap pyntip sha ka Sorkar Pdeng ban leh eiei”.
Ka la ong kum ka Myntri ka tnat ka koit ka khiah, kan pan ïa ka kaiphod bad kan sa pyntip paidbah ïa kaei kaba la kdew ha ka kaiphod halor kane ka jingjia ba sngewsih.
