Shillong, K’Lyngkot 28
U Lamphang ka ïingdorbar thawaiñ ka Jylla, u Thomas A. Sangma, ha ka Sngi Saitjaiñ u la ïashim bynta ha ka sngi sdang jong ka jingplie ïa ka jingïalang ba 84 jong ka All India Presiding Officers Conference (AIPOC) kaba la long ha phyllaw ka ïingdorbar thawaiñ ka Maharashtra ha Mumbai.
Ïa katei ka jingïalang la plie da u Lamphang ka Lok Sabha, u Om Birla, katba u Myntri Rangbahduh ka ri, u Narendra Modi u la ai jingkren lyngba ki kor ka juk stad teknoliji ba mynta ha ka jingïalang.
Ha katei ka jingïalang, la ïakren halor kumno ban pynkhlaiñ ïa ka jingshaniah ki paidbah ha ki shlem treikam ka synshar paidbah, ka jingdonkam ban pynneh ïa ka akor ka burom bad jingjai-jai hapoh Parliament bad ïingdorbar thawaiñ jong ki Jylla/UT bad kumno ban pynlong ïa ka rukom pynïaid ïa ka komiti kaba don jingmut bad kaba khlaiñ.
U Lamphang ka Jylla haba ïashim bynta ha ka bynta ban pynkhlaiñ ïa ka jingshaniah ki paidbah ha ki shlem treikam ka synshar paidbah, ka jingdonkam ban pynneh ïa ka akor ka burom bad jingjai-jai hapoh Parliament bad ïingdorbar thawaiñ jong ki Jylla/UT, u la ban jur halor ka jingdonkam jong ki dkhot ka Parliament bad ki ïingdorbar thawaiñ ki Jylla ban pynneh ïa ka nongrim, jingjai-jai bad ka akor ka burom hapoh ïingdorbar bad ban bud ryntih ïa ki kyndon ba la buh.
U la kdew ba ka jingwanrah ïa ki jinglong ki bym itynnad hapoh ïingdorbar kam pyni ïa ka jinglong babha jong ki dkhot sha u paidbah.
“Mynta ki por lei ngi ïohi ïa ki dkhot kiba leit tur sha ka jaka pdeng jong ka ïingdorbar, rah ‘placard’ bad yn kohnguh ïa ki rai jong ki Presiding Officer, ha kawei ka liang ka long kaba sngewsih bad ka bym ïahap na bynta ka jingsynshar paidbah,” u la ong.
U Sangma u la ai jingmut ba ki dkhot ki lah ban pynsngew ïa ki mat ba ki don ha ka rukom kaba dei bad ki lah ruh ban ïakren ïa ki jingeh bad ki Presiding Officer shabar ka kamra.
U la bynrap ba ki jingïatai hapoh ïingdorbar thawaiñ ka Jylla ki long kiba ïaid beit ïaid ryntih watla ki don teng-teng ki bynta kiba ïa khluit, hynrei lait nangta, la pynneh beit ïa ka akor ka burom hapoh ïingdorbar.
“Ngim ju da kham sakhi ïa kano-kano ka jingïahylla ne ka jingwan tur sha jaka pdeng jong ka ïingdorbar ha ryngkat ki ‘placard’ hynrei teng-teng ka ju don ka jingmih jyndat jong katto-katne ngut ki dkhot haba kim sngew hun halor katto-katne ki mat,” u la ong.
Shuh shuh u Lamphang u la kdew ba ki don ki khep ha kaba ki Presiding Officer ki ju ïadon bynta ha ki jingïakren hapoh kamra jong ki bad ki nongïalam ka liang synshar bad liang pyrshah da ka jingthmu ban pynbeit ïa ki mat da kaba jai-jai bad ka jingsuk katkum ka jinghun lang jong baroh ki kynhun ba ïadon bynta.
