Nongstoiñ, K’Lyngkot 28
Uwei u rangbah uba la 68 snem ka rta, u la duh ei noh ïa ka jingim hadien ba u la shah shoh ha la u jong u khun uba don jingduna ha ka bor pyrkhat pyrdaiñ.
Kane ka jingjia ka la jia ha ka Sngi Saitjaiñ ha ka shnong Langlew kaba ha West Khasi Hills District.
Ka tyllong khubor na ki heh pulit ka distrik, la ïathuh ba utei u rangbah uba la duh noh ïa ka jingim la tip kyrteng kum u Bah Tiarsingh Sohshang (68 snem ka rta) na ka shnong Langlew ha West Khasi Hills.
Ka khubor na ki heh pulit ka distrik ka la ong ruh ba halor katei ka jingjia, ki pulit ki la ïoh pdiang ïa ka jingpyntip na u Sordar ka shnong Langlew, ha kaba ki pulit mar-mar ki la hiar sha katei ka shnong ban pynlong ïa ka jingtohkit kaba bniah.
Shuh shuh la ong ba katkum ka jingïoh jingtip ki pulit, utei u rangbah u la khlad na ka daw ba u la shah shoh ha la u jong u khun uba la tip kyrteng u Drasdingwell Lyngkhoi (25 snem ka rta) bad la ïoh jingtip ruh ba une u khun u dei uba don jingshitom ha ka bor pyrkhat pyrdaiñ.
Na ka liang ki heh pulit ka distrik ki la ïathuh ruh ba halor katei ka jingjia, ki pulit ki la kem noh ïa u khun bad ki la rah ïa u sha Civil Hospital, Nongstoiñ na ka bynta ban phah leh eksamin.
