Shillong, K’Lyngkot 28
Uwei u samla uba na ka shnong Nongmensong u la duh ei ïa ka jingim hadien ba u la hap na kawei ka riat kaba don ha ka thaiñ Sohra ha ka Sngi U Blei.
Katei ka jingjia ka la jia ha ka por 3:30 baje eiei noh phai sngi hadien ba utei u samla lem bad u paralok jong u ki la leitkai sha Mawmluh View Point.
Haba ïakren bad u Sirdar ka Mawmluh, Bah P. Kharwanlang, u la ïathuh ba utei u samla ïa uba la tip kyrteng kum u Bankynmaw Lyngdoh Mairang (22 snem ka rta) u dei uba trei ha Pala Resort, Sohra.
“Ki la wan kai sha Mawmluh View Point. Katkum ka jingïathuh jong uba la wan lang bad u, imat u la leit bakla ha ka por ba u ïeng ba mut leit bar,” u la ong.
Haba kylli, u Bah Kharwanlang u la ïathuh ba ka riat kaba utei u samla u la hap la tip kum ka riat Noh-Khlieh bad ka jaka ba utei u samla u la hap la kumno-kumno ka don kumba 100 mitar eiei.
U la ong ruh ba mar sien jia katei ka jingjia, la pyntip noh mar-mar sha ki bor pulit bad ha kajuh ka por, ki briew ba na shnong kiba la wan poi ha katei ka jaka ki la leit ban hiar sha katei ka riat.
U Sirdar u la bynrap ba namar ka jinglong-jingman jong ka jaka, ki pulit ki la hap ban pyndonkam da u tyllai ban tan ïa ka met jong utei u samla na sha trai riat.
Katkum ka jingïathuh jong u, ïa ka met jong utei u samla la ïoh ban sei ha ka por 8:30 baje mynmiet bad la pynkit noh sha Sohra CHC.
Na ka liang ki bahaïing hasem jong u samla Bankynmaw ki la wan poi ha katei ka jaka ha ka por 6:30 baje eiei ha ryngkat ka jingïam kthang hadien ka jingïoh khubor halor katei ka jingjia.
Shuh shuh na ka liang ki bahaïing ki la pan ban pyllait noh ban leh ïa ka ‘Post Mortem’ halor ka nongrim ba kam don kano-kano ka jingsuba da kumwei pat haba ïadei bad ka jingkhlad jong utei u samla na ka jinghap sha katei ka riat ha shuwa ban wan kit noh ïa u sha la ïing ha Nongmensong.
