Shillong, K’Lyngkot 28
Ka Seng Samla Mawkhar ha ka Sngi Saitjaiñ ka la pynhap pyrda noh ïa ka jingrakhe lyngkhuh dap 25 snem jong ka jingshakri ka Seng Samla Mawkhar ïa ka shnong ka thaw hapoh ka Dorbar Shnong Mawkhar da ka jingiphuh jingiphieng kaba shongkun.
Ka kongsan ha katei ka sngi ka dei ka Myntri ka tnad ka koit ka khiah, ka Dr. Mazel Ampareen Lyngdoh katba u nongmihkhmat ka North Shillong Constituency, u Bah Adelbert Nongrum u la long kum u Symbud Kongsan bad u MDC ka Mawkhar-Pynthorumkhrah pat, u Bah Pynshngaiñ N. Syiem u la long kum u kongsan ba shah khot sngewbha.
Haba ai jingkren ha katei ka sngi kum ka kongsan, ka Dr. Mazel Ampareen Lyngdoh ka la ong ba haba phaidien biang sha ki 25 snem kiba la dep, ka la kylla bak-ly-bak ha kaba ki mat ïakren ruh ki la pher mynta bad mynshwa.
Ka la ong ba kum ka nongïalam ka sngew ba ka dei ka kamram jong ka ban pynlut por bad btin lynti da kaba ïadon ryngkat lem bad ki Dorbar Shnong ha ki prokram bapher-bapher.
Ka la ong ba kum ki samla ki don ïa ka jingbah-khlieh kaba khraw haduh katta-katta kaba kham khraw shuh-shuh ban ïa kiba la kham san kham rangbah namar ki donkam ban peit ba kan don ka jingïakynduh para samla ban ïarap ïa kiwei pat kiba don ha ki jingeh, ban ïasaid lem na ka bynta ka jingdawa bad ka jingdonkam jong ki para samla bad kaba kham kongsan ka long ban hikai ïa kane ka juk kaba mynta bad ka juk ka ban sa bud ban im shabar jong ka jingim marwei jong ka juk teknologi.
Ka Kong Ampareen ka la ong ba kane ka juk kaba mynta ym tang ba ka la kylla hynrei ka la kylla lut nadong shadong ha kaba ha ki por kiba mynshwa hapdeng ki para khynnah samla kiba ïashong ïasah hapoh ka dong ki ju ïa ithuh ithaw bha bad ki ju ïalehkai lang. Hynrei ha kane ka juk kaba mynta kim ïa ithuh shuh iwei ïa iwei namar ba ki la lapmiet tang ha ka peit phone ha ki ïing ki sem.
“Ha kane ka juk nga ïohi ba kam don shuh kum kata ka jingïajan bad ki khun samla jong kane ka juk, phim ïoh shuh ïa kaei kaba ngi ïoh bynta bad ngi ithuh ithaw ïwei ïa iwei ha ryngkat ka jingbah-khlieh lem ïa ki kam”, la ong ka Kong Ampareen.
Ka Kong Ampareen ka la ai khublei ïa ka Seng Samla Mawkhar kaba la rakhe ïa katei ka jingdap 25 snem ha ryngkat ka jinglah jong ka ban tan lem ïa ki khyllung bad ki samla ka shnong sha katei ka rynsan da kaba pynlong ïa ki jingïakob ïalehkai bapher-bapher ban pynshongshit ïa ka shnong ka thaw.
Shuh shuh ka la ong la ïohi ba ïa ki taïew lehkmen jong ki samla la pynlong tang hashwa ka ilekshon hynrei kum ka nongmihkhmat ka la ong ba ka ju pynshlur ïa ki samla ba kin ïai pynlong ïa ki prokram babha ki ban tei bad wanrah ka jingïajan hapdeng ki nongshong shnong.
“Lada phi lah ban pynlong ïa ki prokram kiba kit jingmut bad ïarap ïa ki samla, sngewbha long kiba kloi ban wan sha nga ban pan jingïarap na ka bynta ka bha ka miat jong ki samla bad jong ka shnong”, la ong ka Kong Ampareen.
Na ka liang u Bah Adelbert Nongrum u la pynbna ba hadien ka jingïaishah bad ka jingap kmang kaba la shisnem kynthih ba u la ai ka jingkular ïa ka Seng Samla Mawkhar ba un sa ai kaei-kaei kaba bha, ka tnad sorkar ka la ai ka jingmynjur kaba T. 1 lak tam kum shibynta ka skhim ai jingïarap ïa ka shnong.
Shuh shuh ha katei ka sngi ka Seng Samla Mawkhar ka la pyllait paidbah ruh ïa ka Souvenir ba la pyllait da ka Dr. Mazel Ampareen Lyngdoh, ka jingsam ïa ki Momentos sha ki radbah ka shnong kiba ju kit bad bah ïa ka shnong ba la aiti da kiba shah khot sngewbha ha katei ka sngi.
