Shillong, K’lyngkot 28
Wat la ki seng saiñpyrthei kiba don hapoh ka jylla Meghalaya ki la dep pynbna ïa u kyrtong ban ïakhun ïa ka ilekshon MP Lok Sabha na Shillong konstitwensi, hynrei kaba dang sah mynta ka dei satang ka BJP kaba dei ka seng kaba bat ïa ka jingsynshar ha ka sorkar India.
Haba ïakren bad u President barim ka BJP, Bah Ernest Mawrie, u la ïathuh ba ka seng BJP kam ju pynbna lypa ïa ki kyrtong, hynrei ka ap beit haduh ba ka Election Commission jong ka ri India kan da pynbna ïa ka tarik jong ka sngi thep vote.
U la ïathuh ba ka seng BJP kan sa ai ‘form’ ban khot ïa ki kyrtong kiba kwah ïakhun ïa ka ilekshon MP Lok Sabha ha baroh ka ri India ynda la pynbna ïa ka tarik thep vote bad kan sa pynbna katto-katne sngi shwa ban sdang ban leit thep kyrteng.
“Ka BJP na Delhi ka la phah pynkhreh ïa nga kum u President BJP barim bad ïa u Bah A.L Hek uba dei u MLA uba la jop bunsien ban ïakhun ïa ka ilekshon MP Lok Sabha na Shillong Parliamentary Konstitwensi” u la ong.
U la ïathuh ba haduh mynta ym pat tip mano ban pan tiket, hynrei ka seng BJP ka la phah lypa ïa ki nongkitkam ban pynkhreh ïa ka ilekshon.
U Bah Ernest u la ïathuh ba ha Tura konstitwensi pat, ka BJP ka la phah pynkhreh ïa ka MLA barim ka Ferlin Sangma bad ïa u Bernard N Marak uba dei u MDC ba mynta.
Ha kajuh ka por u don jingkyrmen ba ka BJP kan ïoh ban synshar biang ïa ka ri India sa shisien pat.
Kum ban shu pynkynmaw, ki seng saiñ pyrthei kiba la pynbna ïa la ki kyrtong ki long ka NPP kaba la jied ïa ka Kong Ampareen Lyngdoh na Shillong katba ha Tura ïa ka Agatha Sangma, ka UDP ka la pynbna ïa u Bah Robertjune Kharjahrin, ka VPP ka la pynbna ïa u Dr. Ricky Syngkon bad ka Congress kaba la thikna ban pynïeng biang ïa u Bah Vincent H Pala uba dei u MP ba mynta na Shillong konstitwensi.
