New Delhi, K’Lyngkot 28
U Myntri Rangbahduh ka ri, u Narendra Modi ha ka Sngi U Blei u la plie ïa ka jingrakhe ‘Diamond Jubilee’ jong ka ïingbishar ba hakhliehduh ka ri ha Auditorium jong ka ha Delhi.
U Modi u la plie ruh ïa ki sienjam ai jingtip bad ka teknoloji ba ïadei bad ki paidbah ba kynthup ki ‘Digital Supreme Court Report’ (Digi SCR), ‘Digital Courts 2.0’ bad ka ‘website’ bathymmai jong ka Supreme Court.
Ha ka jingai jingkren ha ka jingïalang, u Myntri Rangbahduh u la ai khublei ïa baroh bad u la pynpaw ka jingsngewnguh ban ïadonlang haba ka ïingbishar ba hakhliehduh jong ka ri ka rakhe ïa ka jingsdang jong ka jingdap 75 snem jong ka bad u la kren ruh shaphang ka Riti Synshar jong ka ri kaba la dap 75 snem ha ki ar sngi ba la leit.
U Myntri Rangbahduh u la ong ba ki nongthaw ïa ka Riti Synshar ka Ri ki ïohi ïa ka jingangnud ïa ka India kaba laitluid katkum ka jinglaitluid, ka jingryntih kyrdan bad ka hok bad ka Supreme Court ka la bteng ban pynneh ïa kine ki jingngeit.
U la ong, “La ka long ka jinglaitluid ban pynpaw ïa ka jingsngew, ka jinglaitluid shimet lane ka hok ha ka imlang sahlang, ka Supreme Court ka la pynkhlaiñ ïa ka synshar paidbah jong ka ri.”
U Modi u la ban jur ïa ki thong na ka bynta ki 25 snem ban wan ïa man ka tnad jong ka Sorkar bad ong ba ki polisi ba ïadei bad ka ïoh ka kot mynta kin long ka nongrim jong ka India kaba phyrnai lashai la shisngi.
“Ki aiñ kiba la shna mynta kin pynkhlaiñ ïa ka lawei jong ka India,” u la ong da ka bynrap, “Ka jingsuk ban ïoh ïa ka jingbishar kaba bha ka dei ka hok jong man u briew jong ka ri bad ka Supreme Court ka dei kaba wanrah ïa kane.”
Da kaba kdew ba ka kam aiñ ha ka ri ka dei kaba la peit bad pynïaid da ka Supreme Court jong ka ri, u Myntri Rangbahduh u la ban ïa ka jingphaikhmat kyrpang jong ka Sorkar ban pynlong ba ki jingshakri ka Supreme Court ki dei kiba ïoh ha baroh ki bynta jong ka ri bad u la kdew ïa ka jingai jingmynjur ïa ka bynta ba lai jong ka projek E-Court Mission.
U la pynpaw ka jingkmen ba ïa ka jingpynkylla ‘digital’ ïa baroh ki kam jong ki ïingshari ha ka ri la peit hi dalade u Chief Justice jong ka ri bad u la ai khublei ïa u namar ki sienjam jong u.
Ha ka jingban biang ïa ka jingkut jingmut jong ka Sorkar ban kyntiew ïa ki jingdon jingem jong ki ïingbishar, u Myntri Rangbahduh u la pyntip ba hadien 2014, palat T.7000 klur la dep pyllait na ka bynta kane ka kam. Ha ka jingpdiang ïa ki jingeh jong ka ïingmala ba mynta jong ka Supreme Court, u Modi u la pyntip ha ka jingïalang shaphang ka jingai jingmynjur T. 800 ha ka taïew ba la dep ban pynheh ïa ka ïingmala jong ka Supreme Court.
Haba kren shaphang ki sienjam ‘digital’ jong ka Supreme Court ba la plie mynta ka sngi, u Myntri Rangbahduh u la pynpaw ka jngkmen shaphang ka jingdon ki rai ha ka rukom treikam ‘digital’ bad ka jingsdang jong ka projek ban pynkylla ïa ka rai jong ka Supreme Court sha ki ktien jong ka thaiñ. U la pynpaw ka jingkyrmen ban don kum kine ki jingpynkhreh ha kiwei-kiwei ki ïingbishar jong ka ri.
Shuh shuh da kaba ban jur ïa ki jingngeit tynrai ka India bad ka jinglong jong ki kam aiñ jong ngi, u Modi u la ban jur ïa ka jingdonkam ki aiñ ban pynpaw ïa ki jingngeit tynrai ka India bad ki rukom treikam katkum ka juk mynta.
U la ong, “Ka jingpynïasohlang ïa ki jingngeit tynrai ka India bad ki jinglong ha ka juk mynta ka long kaba donkam bha ha ki aiñ jong ngi.”
“Ka sorkar ka trei shitrhem ban pynthymmai ïa ki aiñ ban pynïadei bad ka jinglong-jingman ba mynta bad ki rukom treikam ba biang,” u la ong.
