Shillong, K’Lyngkot 28
Ha ka 24 tarik Kyllalyngkot, 2024, u Rajesh Barua u la ujor ejahar ba ha ka 20 tarik Kyllalyng-kot ha ka por kumba 12.30 shiteng synñia, ki runar ki bym ithuh satia ki la rong ïa ka ‘scooter’ jong u (ML-05P-0299) lem bad kawei ka ‘mobile phone’, na Oakland, Shillong.
Ha ka 24 tarik Kyllalyngkot, 2024 ki dkhot ka Seng Samla Nongkynroh (EKH) ki la ujor ejahar ba uwei u briew u bym ithuh satia u la kynthoh pyrshah ïa ka shnong Nongkynroh ha ka rynsan lad pathai ‘YouTube’, da kaba kren beiñ ïa ka Seng Samla bad ki nongshong shnong.
Ha ka 24 tarik Kylla-lyngkot, 2024, u Bikash Deb Nath u la ujor ejahar ba ha ka 19 tarik Kyllalyngkot, u la lap ba ka ‘scooter’ (AS-03Z-4210) ka la jah rngai na ka jaka ba u pynïeng hajan jaka sah jong u kaba ha Lumsohra Laitumkhrah, Shillong. U nongujor u suba ba ka ‘scooter’ jong u ka la shah tuh ha uwei u briew uba la wan jngoh dang shen ïa ka ïing jong u.
Ha ka 24 tarik Kyllalyngkot, 2024, kawei ka briew ka la ujor ejahar ba hapdeng ka 23 tarik Nohprah, 2023 bad 23 tarik Kyllalyngkot, 2024, la sei T. 4 lak na ka ‘Bank Account’ jong ka khlem ka jingmynjur jong ka.
Ha ka 24 tarik Kyllalyngkot, 2024, ka Rita Biswa ka la ujor ejahar ba ha ka 18 tarik Kyllalyngkot, ki runar ki bym ithuh satia ki la rung tuh ha ïing jong ka ha Bhagyakul, Laitumkhrah, Shillong bad rong ïa ki jingdeng ksiar, 2 tylli ki pla synduk, kawei ka baje kti bad kawei ka CCTV, kawei ka DSLR bad T. 97,000/-.
Ha ka 24 tarik Kyllalyngkot, 2024, u Ranu Hajong, Headmaster cum Secretary ka Saptoka SSA UP School (SWGH) u la ujor ejahar ba ha ka miet 22 tarik Kyllalyngkot, ki runar bym ithuh satia ki la prong tuh ha ophis jong ka skul bad rong ïa 5 tylli ki betri.
