Patna, K’Lyngkot 28
U Nitish Kumar na ka seng Janata Dal-United (JD-U) u la bam smai kum u Myntri Rangbah ka jylla Bihar ha ka sien kaba khyndai ha ka Sngi U Blei da kaba kynjat ïa ka seng RJD jong u Lalu Yadav, bad ban ïatreilang biang bad ka seng BJP.
Ha kane ka sngi, u Kumar, 72 snem ka rta, u la weng lut ïa ki Myntri sorkar kiba dei na ka RJD bad u la thung bujli da kiwei pat kiba dei na ka seng BJP.
Nalor u Kumar, la bam smai lang u Samrat Chowdhury bad u Vijay Sinha, na ka BJP, bad kine kin long ki Symbud Myntri Rangbah. Ha kajuh ka por, ki la don sa kiwei pat kiba la ïa bam smai kum ki Myntri.
Ïa ka jingïalang pynbam smai la pynlong ha Raj Bhavan ha Patna. Kane ka dei ka sien kaba san ba u Kumar u la bujli ïa ki seng saiñpyrthei kiba don ha ka sorkar jong u.
U Kumar u la long Myntri Rangbah ha ka sien banyngkong ha u snem 2000. Ha kato ka por, u la ïakhun pyrshah ïa ka RJD bad ïa u Lalu Yadav uba dei u nongïalam kane ka seng. U la wan phai biang kum u Myntri Rangbah ha u snem 2005, bad baroh shi katto, u la ïatreilang bad ka BJP. Hynrei ha u snem 2013, u la ïa khlad lok noh bad ka BJP bad ha ka ilekshon ha u snem 2015, u la ïatreilang bad ka seng RJD, Congress bad kiwei.
Ha u snem 2017, u la ïa khlad lok noh sa bad ka RJD bad u la wanphai sha ka NDA kaba dei ka kynhun synrop jong ki seng saiñpyrthei ba la ïalam da ka BJP. Tangba kam pat kut hangta. Ha u snem 2022, u la ïa khlad lok biang bad ka NDA bad u la shim biang sa ïa ka RJD ban ïatrei ha ka sorkar. Mynta ka sngi pat, u la pyllait biang noh ïa ka RJD bad ïatreilang biang bad ka BJP/NDA.
Ka jingiehnoh jong u Kumar ïa ka RJD ka la sdang ban paw naduh ki khyndiat sngi ba la lah. Hynrei dei tad haduh ka step Sngi U Blei ba ka la paw shai ba un ïatreilang biang bad ka BJP hadien ka jingleit ïakynduh ïa u Lat ka jylla Bihar. Hashwa ban bam smai, u Kumar u la leit aiti ïa ka shithi iehnoh kam kum u Myntri Rangbah ha u Lat, bad hadien kata ka la don ka jingïalang jong ki seng saiñpyrthei kiba ïatreilang ha ka NDA. Ha kane ka jingïalang, la jied ïa u Kumar ba un long u nongïalam, bad la ïashim bynta da ki MLA ka JD (U), BJP, bad Hindustani Awam Morcha (HAM). Hadien kata, u Kumar u la leit biang sha u Lat ban pyni ba u don ki MLA ban thaw ïa ka sorkar bathymmai, bad ha kajuh ka sngi hi, u Lat u la khot ïa u ban bam smai kum u Myntri Rangbah.
