Shillong, K’Lyngkot 28
Ka Dorbar Shnong Rynjah (DSR) ryngkat ka jingïatrei lang bad ka Seng Samla Rynjah Pyllun, ka Seng Kynthei Rynjah Pyllun bad ka Rynjah Cultural & Sports Club ka la pynlong ïa ka taïew tamasa kaba la sdang ha ka 18 tarik u Kyllalyngkot, 2024 bad la pynkut noh ïa ka ryngkat ka khawai shnong da ka Jingïakob Thei bad Rang bhabriew ha ka 26 Tarik u Kyllalyngkot 2024.
Ha kane ka jingïakob, la rah ïa ka nam Thei bhabriew da ka Suwannaki Tariang, katba ka kyrdan ba-ar ka la leit sha ka Pynslai Sun bad ka Ribhalang Sun ka la wan ha ka kyrdan ba lai.
Ïa ka nam Rang bhabriew la rah da u Kenny Benson Kupar Rynjah, katba u Erickson Shylla u la wan ha ka kyrdan ba-ar bad Adrian Mawrie ha ka kyrdan ba lai.
Ki kynrem ki lyndan kiba la ïa poi lang ha kane ka sngi ki kynthup ïa u Bah Pynïaid. S. Syiem, CEM ka KHADC kum u kongsan, u Bah Fantin J. Lakadong, EM ka KHADC kum u symbud kongsan, u Bah Bantylli Nari, President ka SKNSNP, u Bah Dundee Khongsit, President FKJGP bad kiwei-kiwei kiba la shah khot sngewbha.
Ha kane ka sngi la sam ruh ïa ki khusnam sha baroh ki nongjop ha ki jingïalehkai bapher-bapher.
Ka dorbar ha kajuh ka por ka khublei ïa baroh kiba la ïa kyrshan ïa kane ka taïew tamasa jong ka shnong Rynjah.
Kane ka long katkum ka kyrwoh na u Rangbah Shnong ka Dorbar Shnong, Rynjah.
