New Delhi, K’Lyngkot 28
Ka jingbujli jong u Myntri Rangbah ka Bihar, u Nitish Kumar, ïa ki seng saiñpyrthei ba ïatreilang ha ka sorkar, ka la pynlong ïa u ban shah sin kum u ‘Paltu Ram’ bad u ñiangbshiah ba kylla rong.
Ha ka Sngi U Blei, u Kumar u la bam smai ha ka sien ba khyndai kum u Myntri Rangbah ka Bihar hadien ba u la pyndkut noh ïa ka jingïadei bad ka seng RJD kaba u la ïa synshar lang ha ka sorkar naduh u snem 2022. Ka jingsynshar bad ka RJD ka dei hadien ba u la weng noh ïa ka BJP na ka sorkar.
Naduh u snem 2000 bad haduh 2013, u Kumar u la ïatreilang beit bad ka BJP ha ka kynhun synrop National Democratic Alliance (NDA). Hynrei ha u snem 2013, u la weng noh ïa ka jingïadei bad ka BJP. U la leit ban ïatreilang sa bad ka seng RJD jong u Lalu Prasad Yadav, bad ha u snem 2017, u la weng noh ïa kane ka seng bad u la leit phai ban ïatreilang biang bad ka BJP. Ha u snem 2022, u la pyndkut biang ïa ka jingïadei bad ka BJP bad u la khot ïa ka RJD ban don ha ka sorkar. Mynta ka sngi, u la weng biang noh ïa ka RJD ban ïatreilang bad ka BJP/NDA.
Halor kane ka jingkylla ba shiphang-shiphang jong u Kumar, ka seng Congress, RJD, DMK, JMM, Trinamool Congress, CPI(ML)-L bad AAP ki la kynthoh ïa u.
Na ka liang u khun jong u Lalu, u Tejaswi Yadav, uba la long ruh u Symbud Myntri Rangbah ha ki artylli ki sorkar ba la ïalam da u Kumar, u la ong, “U la long u Myntri Rangbah uba la mad ïa ka jingthait… Nga lah ban ai da ka jingthoh ba ka seng JD-U kan sa jah kyrteng ha ka ilekshon 2024. Ki paidbah ki don bad ngi.”
Ka Congress ka la kynthoh ba u Kumar u dei u ñiangbshiah ba kylla rong. U nongaiktien ka Congress, u Jairam Ramesh, u la ong, “U Nitish Kumar, uba bujli shiphang-shiphang ïa ki seng kiba ïatreilang bad u, u kham palat ban ïa u ñiangbshiah ba kylla rong. Ki paidbah ka Bihar kin ym map ïa une u briew uba shyrkhei ban shet kylla bad kito kiba pynshad shrieh ïa u.”
Ha kawei pat ka liang, u Kumar u la pynksan ïa ka jingleit ïatreilang biang bad ka BJP da kaba ong ba kiei-kiei kim shym la ïaid beit ha ka kynhun synrop jong ki seng kiba kwah ban ïakhun pyrshah ïa ka BJP.
“Phi ïa tip baroh kumno nga la wanrah ïa ki seng saiñpyrthei bapher-bapher ban ïatreilang. Hynrei kumba katto katne por mynta, kiei-kiei kim shym la ïaid beit, bad wat ka seng jong nga ruh, kam sngewtynnad ïa kata,” u la ong hadien ba u la dep bam smai ha ka Sngi U Blei.
U la ong ruh ba kane ka sorkar bathymmai kan trei na ka bynta ka bha ka miat jong ka Bihar. “Mynta nga la wanphai biang sha kajuh ka jaka ba nga ju don, bad ngan ym mih nangne,” la ong u Kumar haba kynthoh halor ka jingleit phai ban ïatreilang biang bad ka BJP.
