Nongpoh, K’Lyngkot 29
Uwei u samla na ka shnong Ladsharai, Ri Bhoi District uba dei u nongap pahara jong ka tnat MeECL ha jingkieng Umïam kaba dang don hapdeng ka jingmaramot, u la duh noh ïa la ka jingim hadien ka jingshah bat bording ilektrik ha ka step Lah Sngi U Blei .
Katkum ka jingtip ba la ïoh lum la ïathuh ba utei u samla uba la tip kyrteng kum u Rishanlang Muktieh (25 snem) u la ngat ha katei ka apot ha ka por kumba 5:30 mynstep katba u dang leit tam dieng thang najan uwei u ‘transformer’ uba don marjan bad katei ka jaka ap pahara ha Umïam.
La ïoh jingtip ruh ba utei u transformer uba utei u samla u la ngat u dei jong ka kompani ITD Cementation India Limited kaba pyntrei ïa ka kam maramot ha ka jingkieng Umiam.
Hadien katei ka jingjia, la pynkit noh ïa utei u samla sha Shillong Civil Hospital na ka bynta ban pynïoh jingsumar, hynrei u la khlad noh tang kumba katto-katne por.
