Shillong, K’Lyngkot 29
U MDC ka Mawlai, Bah Teiborlang Pathaw, u la ong ba kum u nongmihkhmat uba la jied da ki paidbah ka Mawlai konstitwensi un nym lehraiñ ban trei na ka bynta ka jingmyntoi ka konstitwensi wat lada u la shah kynthoh ba u dei ban lehraiñ ban mih hadien ba u la shah rem noh ha ka ilekshon MLA ha u snem 2023 na Mawlai.
U Bah Teiborlang u la kren ïa kane haba pynshai halor ka jingkynthoh u MLA ka Nongkrem u Bah Ardent Basaïawmoit uba la ong ba u Bah Teiborlang u la dei ban lehraiñ namar ki paidbah ki la dep pynrem ïa u ha ka ilekshon bad ban da dei ma u, u la shong khop ha ïing ban khem dud.
Haba pynphai ktien halor ka jingong u Bah Ardent wat ju leh MLA jubor, u Bah Teiborlang u la ong ba ïa u la jied da ki paidbah ka Mawlai konstitwensi kum u MDC ba un peit un khmih ïa ka Mawlai konstitwensi bad naduh ba u la jop ha u snem 2019 um shym la shongthait bad kloi ban trei na ka bynta ka konstitwensi, ha kaba u la pynshai ruh ba ym pat don kano-kano ka sien ba un tuklar ïa ki kam jong u MLA ka Mawlai la ka dei ka MLA skhim ne kiwei pat ki kam jong u MLA. Shuh shuh u Bah Teiborlang u la ong ba um donkam satia hi ba un leh kum u MLA kumba la kynnoh u Bah Ardent, namar um dei hi ruh u MLA hynrei u dei u MDC ka Mawlai bad u dei u nongmihkhmat uba ki paidbah ki la jied.
Namar kata, u la ong ba ym don ba lah ban khang ïa u kum u MDC ban trei na ka bynta ka Mawlai konstitwensi. U la buh jingkylli ruh ïa u Bah Ardent hangno ka don kata ka aiñ kaba ong ba u MDC um lah ban trei la ka dei ban wanrah skhim pynroi na ka Sorkar Kmie, Sorkar Jylla ne na kino-kino kiwei pat na ka bynta ka jingmyntoi u paidbah.
U Bah Teiborlang u la ong ruh ba haba ki nongïalam shnong ki wan pynsngew sha u ban ïathuh ïa ki jingdonkam ïa ki kam pynroi ha shnong ha thaw, ka dei ka kamram jong u ban thawlad, hynrei ban shu kynnoh ba u MDC u leh MLA jubor ka long kaba bakla. Kumta u la ong ba ym don ba lah ban khang ïa u ban trei na ka bynta ki paidbah ka Mawlai, bad un nang trei shuh shuh na ka bynta ban wanrah ïa ki kam pynroi kiba ka Mawlai ka donkam na ka bynta ka jingmyntoi ki paidbah.
U la ong ruh ba naduh ba u la shah jied kum u MDC, u dei u shakri jong ki paidbah ka Mawlai, bad ha ka jingïaid lynti u la ïohi shibun ki kam kiba ka Mawlai ka donkam, bad kum u MDC u la trei shitom ban wanrah jingkylla ïa ka Mawlai da ka jingïatreilang bad ki nongïalam shnong bad ki paidbah.
U Bah Teiborlang u la ai nuksa ruh katto-katne ki kam kum ka jingsiang ïa ki lynti ïaid kjat ha kaba na ka liang jong u, ha ryngkat bad ki shnong ki la leit ban pynsngew sha ka Sorkar Jylla, ka jingshna ïa ki surok kiba donkam kiba la sahteng la bun phew snem, nalor ka jingbuddien ban pynrung ïa ki katto-katne ki shnong ha Mawlai ban ïoh ïa ka skhim 100 sngi ha kaba ka la urlong da ka jingleit tur barabor bad kine ki la urlong na ka bynta ka jingmyntoi ki paidbah ka Mawlai.
U la ong ba da ka jingïai buddien, ki shnong ha Mawlai ki bym rung hapoh ka skhim 100 sngi ki la rung mynta ha kaba la lah ban pynkylla sha ka Census Village ym shuh ka Census Town.
U Bah Teiborlang u la ïathuh ruh ba ka surok na Mawlai by-pass kaba ïaid lyngba ka shnong Umsaw ka dei ka jingtrei shitom jong u lem bad ki nongïalam shnong bad mynta ka la urlong ha kaba ka jingtrei ka la ïaid shakhmat, nalor ka jingwanrah ïa ki floodlight ha Madan Heh Stadium. Shuh shuh u MDC ka Mawlai haba jubab ïa ka jingkren u MLA ka Nongkrem u Bah Ardent uba la ong ba u MDC u dei ban sngew lehraiñ, u la ong ba wat lada u rem ha ka ilekshon MLA, um lehraiñ ban shakri ïa u paidbah bad u dei u MDC uba u paidbah u la jied bad wat lada ki paidbah kim ibit shuh ïa u ruh, u kloi ban trei na ka bynta jong ki paidbah.
Une u MDC u la ong ruh ba u don da ki hajar ki longïing kiba u la pynim ja bad nangne shakhmat un dang trei shitom shuh shuh ban ïarap ïa kiwei ki longïing kiba donkam ïa ka jingïarap jong u. Namar kata, u la kyntu ïa ki paidbah ka Mawlai ba ma ki ruh kim dei ban lehraiñ ban wan sha u namar un trei bad ïarap katba lah.
