Shillong, K’lyngkot 29
Ka Sorkar Pdeng ka la buh por ban pyndep ïa ka skhim shna surok Pradhan Mantri Gram Sadak Yojana (PMGSY) I bad II hapoh ka 31 tarik u Lber, 2024 bad kumba ka long mynta ka Sorkar Jylla ka la lah ban kyntiew kyrdan ïa ki surok kiba la don lypa kumba 1,250km lyngba ka PMGSY-III.
Ïa kane la ïathuh da u Symbud Myntri Rangbah u Bah Prestone Tynsong uba peit ïa ka tnat shna surok hadien ba u la pynïaid ïa ka jingïalang halor ka jingpyntreikam ïa ka PMGSY ha kane ka Jylla.
U Bah Prestone u la ong ba ïa ka PMGSY- I & II ka Sorkar Pdeng ka la buh por ba dei ban pyndep hapoh ka 31 tarik u Lber 2024 bad ki don sa katto-katne tylli ki projek kiba dang dei ban poi sha ka thong ban pyndep.
U la ong ba ki shnong ha nongkyndong ki bym pat ïoh surok la leh katkum ka khana samari bad ha kane ka Jylla ka PMGSY-I la sdang naduh u snem 2003 ter ter ha kaba ki shnong ki bym pat ïoh surok ki dei ban pynïasoh lyngba ka surok kali.
Hynrei u la ong ba ki don pat ki shnong kiba mih thymmai kiba phiah na ki shnong kiba la don lypa bad ki don kiba ym pat ïoh surok.
U la ong ha une u snem ba mynta, la sdang sa ïa ka skhim ‘CM Connectivity’ ban pynïasoh ïa ki shnong ki bym pat ïoh surok.
U la bynrap ba ka thong ka long ba ym dei ban don ki shnong ki bym pat ïoh surok bad yn thawlad ban ïoh surok noh ki shnong.
Haba ïadei bad ka PMGSY-III, ki don ki surok kiba la don lypa kiba la kyntiew kyrdan lyngba kane ka skhim bad haduh mynta ki la don ki surok kiba la dep kyntiew kyrdan kumba 1,250 km.
U Bah Tynsong u la ong ba nalor ka PMGSY, ki don ruh ki surok kiba la shna lyngba ka skhim North East Special Infrastructure Development Scheme (NESIDS), NABARD, CRF bad kiwei kiwei.
U la ong ba naduh u snem 2018, ka jingmang pisa ka la kot sha ka T.10,000 klur na ka Sorkar Pdeng bad Sorkar Jylla.
Shuh shuh u Bah Tynsong u la ong ba ka jingshna ïa ki surok ka don la ka jong ka rukom batai kumno ban shna bad ym lah satia ban ïapeiñ bad ka jingbha jong ka surok ha ka por ba shna.
U la ong ba na ka bynta ki surokbah ka Sorkar Pdeng ka don la ka jong ka rukom shna bad na ka bynta ki surok kiba dei lyngba ka Sorkar Jylla ka don la ka jong ka rukom shna, hynrei kaba kongsan ka long ban shna ki surok kiba biang.
