Shillong, K’Lyngkot 29
Ka NPP kan sa wanrah ïa ka kaiphod haba ïadei bad ki jingjop jong ka Sorkar MDA hapoh ka jingïalam ka NPP ha ki 6 snem ba la dep ha ka jingïalap ilekshon na bynta ka Shillong bad Tura Parliamentary Konstitwensi.
Haba kren sha ki lad pathai khubor hadien ka jingïalang jong ka NPP East Khasi Hills District Committee ha ka Lah Sngi U Blei, u President ka NPP East Khasi Hills District, Bah Gavin Miguel Mylliem u la ong ba ka seng ka dang pynkhreh ïa ka kaiphod ba ïadei bad ka jingjop naduh ba ka la shimti ïa ka jingsynshar ha u snem 2018.
U la ong ba ka komiti jong ka distrik ka la nang pynkhreh ban ïalap na bynta ka kyrtong jong ka seng ka ban ïa aireng na Shillong Parliamentary konstitwensi, Dr. M. Ampareen Lyngdoh.
U President u la ong ruh ba ka jingpynleit jingmut jong ka seng haba phai sha ka jingïalap ilekshon ka long ban pynsngew ïa ka kaiphod jong ka jingjop ka Sorkar hapoh ka jingïalam ka NPP.
Katkum ka jingïathuh jong u, ka seng kan sa pynlong ïa ka jingïalap ilekshon ha 10 tylli ki blok kiba hap hapoh ka distrik ban pan jingkyrshan ïa ka kyrtong ka seng.
“Ngi kyrmen skhem ba ki paidbah kin sngewthuh halor ki kam kiba la leh da kane ka Sorkar shisien ba ki la ïohi ha ka kaiphod,” la ong utei u nongïalam. Ha kawei ka liang, u la kubur ba ki don bun bah ki jingkynnoh ba khlem nongrim pyrshah ïa ka seng na kiwei pat ki seng saiñ pyrthei.
“Ngin leit sha ki paidbah ban pynshai halor kine ki jingkynnoh,” la ong u Bah Mylliem.
Shuh shuh u la bynrap ba ka seng ka dang ïaleh kumno ban pynkhlaiñ ïa ki tnad treikam ha ki kyrdan jong ka Block haduh Primary Unit.
“Ngi tip ba ka ilekshon ka dang jngai. Hynrei ngi sngewthuh ba ka long kaba donkam ban pynkhlaiñ ïa ki tnad treikam khnang ba ka seng kan nang kiew ha Ri-lum Khasi,” u la ong. Kumban shu kdew hangne, u State President ka NPP, Bah Prestone Tynsong u la pynskhem ïa ki dkhot bathymmai jong ka NPP East Khasi Hills District Executive Committee ha kane ka sngi.
