Shillong, K’Lyngkot 29
Ki nongtrei jong ka Emergency Service 108 kiba don hapoh ka shatri jong ka Meghalaya EMRI Worker Union (MEMRIWU) ha ka Lah Sngi U Blei ki la leit ban ïakynduh ïa ka Myntri ka tnad ka koit ka khiah, ka Dr. Mazel Ampareen Lyngdoh ban dawa ba ka sorkar jylla kam dei satia ban ai pynïaid ïa ki kali 108 sha kiwei pat ki tnad treikam ne ki kompani.
Haba kren sha ki lad pathai khubor, na ka liang u President ka MEMRIWU, u Bah Roipar Kharraswai u la ong ba katei ka jingwan ïakynduh ïa ka Myntri ka tnad ka koit ka khiah bad ïa u Mission Director ka long ka bym seisoh.
Ka Union ka la pynpaw ba ka dap da ka jingsngewsih namar ba naduh ba kut treikam kawei ka kompani kaba pynïaid ïa kitei ki kali 108, ka tnad ka koit ka khiah jong ka sorkar jylla ka la pan por tang 3 bnai ban wad da kiwei ki ban pynïaid ïa kitei ki kali 108 hynrei haduh mynta ka la ïaid kumba shisnem shiteng, ka sorkar pat ka khlem lah satia ban pynbeit ïa katei ka kam.
U Bah Roipar u ong ba kumba ka long mynta, ïa kitei ki kali 108 la bteng ban pynïaid hi da ka National Health Mission (NHM). Na ka liang ka Union ka la dawa ba ka sorkar ka dei ban pynïaid hi beit ïa katei ka kam namar kumba ka long mynta lei ïa katei ka kam la pynïaid da ka sorkar jylla la kumba shisnem tam ha kaba ha ka liang ka pisa ka tyngka ruh, ka sorkar jylla ka la pynïaid beit khlem kano-kano ka jingïarap na ka sorkar pdeng.
”Lah shisnem shiteng mynta, ka kam ka jam ka ïaid beit ïaid ryntih, nga sngew ba na ka liang jong ka sorkar kam don jingeh shuh ban pynïaid hi ïa kane ka kam bad ka pisa ruh ka lah dei 100%, kam don shuh kaba wan napoh ka sorkar pdeng hynrei ka dang ai shi ai pat ban pynïaid da ka NHM”, la ong u Bah Roipar.
U la ong ha ka jingshisha kam dei shuh ka bynta jong ka National Rural Mission hynrei ka sorkar ka la dei ban thaw ïa la ka jong ka Emergency Cell ban pynïaid ïa katei ka kam.
Nalor nangta, u la ong ba ha kine ki shisnem shiteng hadien ba ka sorkar ka la khot da ka kontrak ka khlem lah satia ban pynbeit ïa ka kam haduh mynta bad kane ka pynpaw ba na ka liang jong ka sorkar ka la shu pynsahteng ïa kane ka kam kaba la wanrah jingeh shiktadei eh ïa ki nongtrei ka Union. Kane ka dei namar ba kane ka rukom pynïaid kaba mynta ka la long ba la siew ïa kitei ki nongtrei tang ka tulop bad kam shym la don kino-kino ki jingai jingmyntoi kiba kynthup naduh ka jingshim shuti, ka jingïoh jingsumar ei nalor kiwei kiwei ki jingmyntoi kiba kum ki nongtrei jong ka Union ki dei ban ïoh.
U la ïathuh ba ha u bnai Naiwieng jong u snem ba la dep hadien ba ka sorkar ka la khot tender, ki la don 7 tylli ki kompani kiba la thep (tender). Hynrei namar ka jingbym sngewthuh jingmut jong ki para kompani, ka la mih ka jingkulmar hapdeng kitei ki para kompani kaba la pynlong ïa ka sorkar ba kan pynsangeh noh ïa ka jingkhot ban thep ‘tender’ bad ka sorkar ka la pynbna ba kan sa khot thep ‘tender’ biang pat ha ki bnai ban wan.
“Ka sorkar kam dei shuh ban khot thep ‘tender’ biang namar kin sa mih shibun ki jingkulmar namar kumba ka long mynta kim pat ïoh ïa ka ‘tender’ hynrei ki la pynkulmar pat ha kaba ki la kynnoh sniew kawei ka kompani ïa kawei pat ka kompani”, la ong u Bah Roipar.
U la ïathuh ba na ka liang ka Myntri koit ka khiah ka la phah wan biang ïa ka Union ha ka sngi nyngkong ka 6 tarik u bnai Rymphang 2023 na ka bynta ban ïathir bad ïakren halor kitei ki mat bad na ka liang ka Union ka la aipor ïa ka sorkar ba ha ka sngi nyngkong ka dei ban pynsngewthuh noh ïa ki nongtrei ka 108 ha kaba ïadei bad katei ka kam.
