Shillong, K’Lyngkot 29
Ki nongïalam jong ka Union of Cook-cum-Helper ha ka taïew kaba la dep ki la leit ban dawa bad pynsngew ïa ki jingeh jong ki shaduh ka Sorkar Pdeng ha kaba ïadei bad ka jingkyntiew noh ïa ka ‘Honorarium’ lane ka jingsiew jong ki nongshetja sngi ha ki skul na ka T. 2,000 sha ka T.5,000.
Haba kren sha ki lad pathai khubor ha Shillong Press Club ha ka Lah Sngi U Blei, na ka liang ka President jong ka Union ka Kong Banalis Syiem, ka la ïathuh ba u Secretary jong ka Ministry of Education ka Sorkar Pdeng u Sanjay Kumar u la kular ban buh hakhmat eh ïa katei ka jingdawa jong ka Union. Ha katei jingleit sha Delhi, la synranlang ïa ki nongïalam jong ka Union da ka Kong Delina Khongdup kaba dei ka dkhot jong ka National Commission for Women.
Ka la ïathuh ba u Kumar u la ong ba ïa kane ka mat jong ki nongshetja sngi u la kular ban buh hakhmat bad ban shim ruh kum ka mat kaba kyrpang tam namar ba u sngewthuh ïa ka jingpan jong ki kam dei kaba khia haduh katta-katta.
“Katkum ka sur kaba u kren, ngi khmih lynti ba kin sa pyntreikam noh mynta u snem hi hadien ka Financial Year,” la ïathuh ka Kong Syiem.
“Kum ki nongshet ja sngi ha ki skul, ngi kyrpad ruh ïa u Myntri Rangbahduh ka ri u Narendra Modi ba un sngewsynei ïa ki nongshetja sngi ban kyntiew ïa ka jingsiew Honorarium na ka mang tyngka jong ka Sorkar India,” la ong ka Kong Syiem.
“Ngi kyrpad ruh ïa u Myntri Rangbah ka Jylla Assam u Himanta Biswa Sarma uba dei u nongïalam ha kane ka thaiñ Shatei Lammihngi ban ïakren lem ïa kine ki jingdawa jong ngi bad ka Sorkar India ha Delhi,” la kyrpad kane ka nongïalam jong ka Union of Cook-cum-Helper.
Katkum ka jingïathuh jong ka Kong Syiem, ki nongshetja sngi ha baroh ki skul hapoh ka jylla ki don kumba 20,000 ngut bad ki ïoh ïa ka bainong na ka Sorkar Jylla kaba long T.1,100 bad T.900 na ka Sorkar Pdeng.
Haba kylli, ka la ïathuh ba ka Union ka la dawa ba ka Sorkar ka ai ïa ka Identity Card, ban siew ïa ka bainong baroh 12 bnai, ban siew ïa ka Honorarium man la u bnai bad ban ai shuti ha ka por ba ki nongshetja sngi ki pang.
U Nongaibuit jong ka Union, Bah KL Pariat u la ïathuh ba ka Union ka la dawa ruh ïa ka Sorkar ban pyntreikam ïa ka shuti Maternity Leave ne ka shuti kha khunlung namarba bun na ki nongshet ja sngi ha ki skul ki dei hi ki kynthei.
“Ngi la ïakren ban siew man la u bnai namarba ki nongshetja sngi ki shet naduh ka Lah Sngi U Blei haduh ka Sngi Thohdieng bad ïa pisa dei ban pynpoi ha ka Bank Account. Baroh ki khlieh pynïaid skul ne ki Headmistress jong ki skul ki dei ban pynshlur ïa ki nongshetja sngi ban plie ïa ki ‘Bank Account. Bun ki bym pat pyntreikam ban pynpoi ïa ka pisa ha ki Bank Account khamtam mynshwa leilei ka pisa ka poi sha ki nongshet ja sngi tang arsien ne lai sien ha ka shisnem,” u la ong.
