Shillong, Kyllalyngkot:
Ka Smile Train, kaba long ka seng treimon sngewbha kaba heh tam ha ka pyrthei kaba phai khmat bha sha kito kiba kad shyntur, ka la ïasnohkti lang bad ka University of Science and Technology Meghalaya (USTM) ban pynlong ïa ka jingpynshai paidbah hapdeng ki samla pule bad pynlong ruh ïa ki jingpynmih pisa. Ïa kane ka sienjam treikam kaba long kum ka jingprat lynti shaphang kane ka kam la ïashim bynta ba jan kumba 2000 ngut ki samla pule ha USTM. La wan ban pyniphuh iphieng ïa kane ka jingïalang da ka jingïadonlang jong u Mahbubul Hoque, Chancellor USTM, Prof GD Sharma, Vice Chancellor USTM, Dr D.M. Momin, Senior Medical Officer cum District Nodal Officer, RBSK, I M. Tomang (DEIC Manager, Ri Bhoi District), u Johnson, State Coordinator, National Health Mission; ki nongmih khmat na ka Smile Train, Woodland Hospital, bad bun ngut ki samla ka USTM.
Ha India, katkum ka jinglum jingkheiñ la shem ba palat 35,000 ngut ki khynnah kiba la kha ki don ïa ka jingkad shyntur/ne jingkad ki bynta ba shapoh jong ka shyntur man la u snem. Ka jingbym sumar ïa ka jingkad shyntur ka pynlong ïa ki khynnah ba kin im ha la marwei bad mad ïa bun ki jingeh ban bam ban dih, ban ring mynsiem, ban ïohsngew, bad ban kren namar ba bun na ki kim lah kot bor ban phah sumar bad wanrah ka jingkylla ha ka jingim jong ki. Haba kren halor kane ka phang, u Mahbubul Hoque, Founder Chancellor, USTM, u la pynpaw, “Ka jingtreikam ba radbah bad ba aiti lut ban kner ki kti sha ki bynta bapher bapher bad ka jing long pdiang sngewbha ka pynlong ïa ki briew ba kin sngew shongdor ka jingim bad ïoh ïa ka jingburom. Ka Smile Train ka leh bun ki kam ban ai jingshakri ïa ki paid bynriew, bad nga kyrmen ba kane ka jingïalap paidbah kan wanrah ïa ka jingpynsngewthuh hapdeng kiba bun.”
