Shillong, K’Lyngkot 29
U Abu Taher Mondal uba dei u Myntri ba khmih ïa ka tnat Bording ka jylla, u la ong ba kan sa don ka jingkhang dam ïa ka jingïaid jong ki kali ha ka jingkieng Dam, ha ka por ba bujli ïa ki bearing.
U Mondal u la ong ba ka Sorkar kan sa khang ïa ka ïaid ka ïeng ki kali na jingkieng Umïam ha u bnai Rymphang ban ïoh bujli ïa ki bearing bad pyntip ruh ba ïa ka jingkieng Umïam yn rah kum shibynta jong ka kam ban bujli ïa ki bearing, kaba lah ban long ha ka taïew ba-ar jong u bnai Rymphang.
Shuh shuh na ka liang jong u Myntri u la ong ba ka sorkar kan sa buh ka jingkyrpad ïa ki paidbah bad ïa ki nongñiah kali ba kin ïaid noh na kawei pat ka surok bad ïa ka sngi ban khang dam bad ki kynta ban khang, yn sa pynmih bad pynbna ynda la jan dei ka por.
U Myntri u la ong, “Hadien ba la dep bujli ïa ka bearing ngin sa ap ïa ka por ban eh ka dewbilat bad ngin sa pynhiar ïa u jack ba ka jingkieng kan hiar biang kumba ka ju long,” bad bynrap ruh ba ha kane ka sngi la khmih lynti ba ka jingkhang ïaid kali kan neh kumba phra kynta eiei hynrei hadien ba la buh biang ïa ka jingkieng ha ka jaka ba dei, yn sa shah shwa tang ïa ki kali rit bad kali kit nongpang.
Ha kajuh ka por, u Myntri u la pyntip ba ka National Highway Infrastructure Development Corporation Limited (NHIDCL) ka la khmih ïa ka kam ba ïadei bad ka jingithuh ïa ka jaka ban shna lynti ïaid ba thymmai ne kawei pat ka lynti ïaid ban lait na ka jingpyndonkam ïa ka jingkieng.
“Nga la dep ban ïakren bad ka NHIDCL bad ka la pyrshang ban wad ïa ka lynti ïaid na shawei pat ka jaka ban ïoh ïaid ki kali,” la pyntip u Myntri bad ha kaba ïadei bad ka jingkieng rim kaba don ha khrum ka jingkieng Umïam, u Myntri u la ong ba kane ka jingkieng ka dei kaba la shu ieh la slem bah bad kiba bun ki briew ba la leit jngoh ïa ka, ki pyntip ba kam long shuh ban pyndonkam ha kaban pynïaid kali.
