Nongpoh, K’Lyngkot 29
Ha kawei ka jingjia ïatyngkhuh kali ha ka Lah Sngi U Blei, uwei u rangbah u la khlad noh hashen katba ar ngut kiwei pat ki la mynsaw jur.
Une uba la khlad noh hajuh u dei u nongñiah ka kali Auto-rickshaw kaba don ïa u nombar ML10-C-6897 katba ar ngut kiwei pat ki la mynsaw jur hadien ba kane ka Auto kaba ki shong ka la leit ban tynrah ïa ka trok kaba don ïa u nombar AS01-GC-0191 ha jingkieng Umlew jong ka surok Shillong Bypass.
Katkum ka jingtip ba la ïoh lum la ïathuh ba katei ka Autorickshaw ka dei kaba dang ïaid na Umroi sha Toll Plaza bad kaba la pynher sted bha. Ynda poi ha katei ka jingkieng ha ka por kumba 11:35 mynstep, u nongñiah ïa uba la tip kyrteng kum u Dhiren Chandra Barman um lah shuh ban tehlakam ïa la ka kali bad leit ban tynrah beit markhmat ïa ka trok kaba dang wan na ka liang pyrshah.
Ha kane ka jingjia, katei ka Autorickshaw ka la pra hi phom bad pynlong ruh ïa u nongñiah ban khlad hashen, katba ki ar ngut kiba don lang ha katei ka Autorickshaw ki la mynsaw jur bad la pynkit noh sha Bhoirymbong CHC na ka bynta ban pynïoh ïa ka jingsumar kaba kyrkieh. Na ka liang ki pulit ki la pynkit noh ïa baroh ar tylli kitei kali kiba ngat ha katei ka jingjia sha Khapmara PIC na ka bynta ban pynlong ïa ka jingtohkit.
Ïa ka met jong u nongñiah ka kali Autorickshaw la pynkit noh sha Nongpoh Civil Hospital na ka bynta ban pyndep ïa ka ‘postmortem’ bad hadien la aiti noh sha ki bahaïing na ka bynta ban pyndep ïa ka jinglehniam khatduh. Shuh shuh, la ïoh jingtip ruh ba u nongñiah katei ka trok, u la phet krad noh hadien katei ka jingjia.
