Shillong, K’Lyngkot 29
Ka Screening Committee jong ka All India Congress Committee (AICC) ha ka Lah Sngi U Blei ka la hap ban ai jingmynjur ïa ka kyrteng jong u Bah Vincent H Pala bad u Saleng A Sangma ba kin long ki kyrtong ka seng Congress ha ka ilekshon MP Lok Sabha na Shillong bad Tura Parliamentary Konstitwensi.
Dei tang u Bah Pala, uba dei ruh u MP ba mynta, bad u Saleng, uba dei u MLA ka Congress na Gambegre konstitwensi, kiba la pan tiket ban ïakhun ïa ka ilekshon MP mynta ka kynti.
Ïa ki kyrteng jong kine ki arngut la ai jingmynjur ha ka jingïalang jong ka Screening Committee kaba la long ha Guwahati hapoh ka jingpynïaid jong u Chairman ka Committee, u Rana KP Singh.
Kham hashwa, ka Screening Committee jong ka Meghalaya Pradesh Congress Committee (MPCC) ka la ai jingmynjur ïa ka kyrteng jong u Bah Pala bad u Saleng.
Na ka liang ka Screening Committee jong ka AICC kan phah ïa kitei ki kyrteng sha ka Central Election Committee na ka bynta ban ïoh ïa ka jingmynjur bakhatduh hashwa ban pynbna paidbah ïa ki ba kin dei ki kyrtong jong ka seng Congress.
Ha ka jingïalang kaba la long mynta ka sngi ha Guwahati, nalor jong u Bah Pala bad u Saleng, la wan ban ïashim bynta ruh da u Ban Ronnie V Lyngdoh uba dei u nongïalam ki MLA ka seng Congress.
Kumba ka long mynta, na Shillong Parliamentary Constituency, ki kyrteng jong ki kyrtong ki ban ïakhun ki long u Bah Pala na ka seng Congress, Kong M Ampareen Lyngdoh na ka seng National People’s Party (NPP), Dr Ricky AJ Syngkon na ka Voice of the People Party (VPP), Bah Robertjune Kharjahrin na ka United Democratic Party (UDP) ha ryngkat ka jingkyrshan ka Hill State People’s Democratic Party (HSPDP), bad u nonghikai ha NEHU, u Bah Lakhon Kma.
Ha Tura, ki kyrteng kiba la paw haduh mynta ki long jong u Saleng bad jong ka MP ba mynta na ka seng NPP, ka Agatha K Sangma.
