Shillong, K’Lyngkot 29
Ka Dorbar Mang Tyngka jong ka jylla Meghalaya kan sdang naduh ka 16 tarik Rymphang, 2024 bad kane ka long hadien ba u Lat, u Phagu Chauhan, u la ai hukum ba ki dkhot ka Ïingdorbar Thawaiñ kin ïakynduh ha kane ka sngi.
Haba pynmih ïa ka jingpynbna, u Dr Andrew Simons, Commissioner & Secretary ka Meghalaya Legislative Assembly, u la ong ba u Lat, da kaba pyndonkam ïa ka bor ba la pynkhamti da ka Clause (1) jong ka Article 174 jong ka Riti Synshar ka Ri India, u la khot ïa ka jingïakynduh jong ka Ïingdorbar Thawaiñ ka jylla ha ka 16 tarik Rymphang, 2024 ha ka Ïingdorbar Thawaiñ ba shipor ha Rilbong.
Ha kajuh ka por, u Commissioner & Secretary u la pyntip ba ka jingïalang jong ka Business Advisory Committee hapoh ka jingïalam jong u Lamphang, u Thomas A Sangma, kan ïakynduh ha ka 2 tarik Rymphang ban pynbeit ïa ki mat ki jura jong ka Dorbar Mang Tyngka.
Ki dkhot jong kane ka Committee ki long u Symbud Myntri Rangbah, u Bah Prestone Tynsong, u nongïalam ka Liang Pyrshah, u Bah Ronnie V Lyngdoh, bad ki MLA, u Bah Charles Pyngrope bad u Bah Lahkmen Rymbui.
Mynta u snem, ka Dorbar Mang Tyngka ka la sdang kham kloi haba ïanujor bad ki snem kiba la leit noh. Barabor, kane ka Dorbar ka ju long ha u bnai Lber. Ka jingpynlong kloi ïa ka Dorbar Mang Tyngka ka lah ban dei namar ka jingthmu jong ka Election Commission of India ban pynbna ïa ki tarik jong ka ilekshon Lok Sabha.
Lah ban kdew ba ka Dorbar Mang Tyngka jong ka Ri kan sdang naduh ka 31 tarik Kyllalyngkot bad ha ka 1 tarik Rymphang, yn wanrah ïa ka Mang Tyngka ba shipor jong u snem 2024-25. Kane ka Dorbar Mang Tyngka jong ka Ri kan kut ha ka 9 tarik Rymphang.
