Shillong, K’Lyngkot 29
Ka Khasi Students’ Union-South Khasi Hills District Unit hapoh ka jingïalam u President, u Samla Reebokstar Diengdoh ha ryngkat bad u General Secretary, u samla Edmund Khongsya ha ka 29 tarik u Kyllalyngkot 2024 ki la leit ban ïakynduh bad aiti da ka dorkhas ha u Chief Executive Member (CEM) ka Khasi Hills Autonomous District Council (KHADC), u Bah Pynïaid Sing Syiem ha kaba ïadei bad ki kam jong ka Elaka bad ka Hima ha ka thaiñ Sohra bad Shella kaba hapoh ka Elaka Mawlong.
Lyngba katei ka dorkhas, ka seng ka la kdew ba ka ïew be-aiñ kaba la long trai da ki bar jylla kaba don ha Lubia (Kalibari) ka la pynkheiñ ïa ki aiñ bapher-bapher jong ka KHADC bad kine ki bar jylla ki la tei ruh ïa ki jaka mane blei hapoh ka Elaka khlem kano-kano ka jingïoh jingmynjur na ki bor jong ka Council.
Shuh shuh ka seng ka la pyntip ruh ba hapoh kane ka thaiñ, ki bar jylla ki la ïoh ban rung laitlan shapoh ki shnong ki thaw kiba hap hapoh ka Elaka Mawlong bad ki la leh ruh ïa ki kam khaïi be-aiñ khlem ki Trading License kiba biang na ka KHADC.
Ha kajuh ka por ka seng ka la pynpaw ruh ka jingpyrshah halor ka jingkhanglad ïa uwei u briew uba long u trai shnong ïa uba la tip kyrteng kum u Bah T. Diengdoh uba buh ïa ka dukan die dohsniang ha kaba ka ophis jong u Syiem ka Hima Sohra ka la ai jingmut ïa u ban un shu wai noh da ka dukan ha Majai katba ïa ki bar jylla pat kiba wan buhai shnong ym don jingkhanglad ne jingpyndik ha kaba ïadei bad ka jingleh ïa ki kam khaïi beaiñ.
“Na ka liang jong ngi ka seng, ngi ju ai ïa ki jingthoh sha ka Hima Sohra hynrei ngi ïohi ba kim seisoh, kumta ngi la lum ïa ki jingthoh bad ki sakhi baroh bad ngi la wan sha u CEM namar kane ka la long kaba pynsat ïa ngi bad ngim lah shuh ban shu shah sah haduh kine ki sngi kiba mynta”, la ong u samla Diengdoh.
Ha kaba ïadei bad kane, na ka liang ka seng ka la kyntu ïa ka KHADC ba kan shim khia halor kane ka jingrung bad khaïi beaiñ jong ki bar jylla hapoh u pud u sam jong ka Elaka bad ruh ka jingailad jong u Syiem ka Hima Sohra bad ruh ka Elaka Mawlong.
