Shillong, K’lyngkot 30
Namar ba u Tirot Sing Syiem, u Syiem ka Hima Nongkhlaw u la ïap ha byndi ha Dhaka kaba dei ka nongbah jong ka ri Bangladesh ha ka por ba synshar ka sorkar Phareng, kumta ban pynsahnam ïa une u khlawait jong ka jaidbynriew, ka sorkar Jylla kan sa kit noh ïa u motdur jong une u riewshlur ha ka 2 tarik Rymphang 2024 na State Central Library Shillong sha Dhaka.
Ïa une u motdur naduh syngkai shaduh khlieh la shna da u Bah Rafael Warjri bad ïa kane ka kynhun yn ïalam hi ma u ban kit na Shillong sha Tamabil, Sylhet haduh Indira Gandhi Cultural Centre kaba don ha Dhaka. Katba ha ka 16 tarik u Rymphang 2024, u Symbud Myntri Rangbah ka jylla u Bah Sniawbhalang Dhar ryngkat u Myntri ka tnad Art and Culture u Bah Paul Lyngdoh, ki MLA bad ki ophisar kin sa plie ïa u motdur jong u Tirot Sing.
Ban tip kham bniah kumno la shna ïa u mot jong u Tirot Sing, la ïoh ban ïakren kyrpang bad u Bah Rafael Warjri ha phyllaw jong ka State Central Library Shillong uba la ïathuh ba nyngkong ki la dep shna ïa u motdur jong u Tirot Sing ha u bnai Naiwieng 2023. Hynrei ynda la leit buh ha Dhaka um shym la ïahap namar u rit palat, namar u motdur jong ka Indira Gandhi u la heh bha.
U la ïathuh ba ha kata ka por u la ai jingmut ïa ki ophisar ba lada long yn shna da uwei uba heh khnang ban ïa ryngkat. Kumta haba ki ophisar ki la mynjur u la wanrah biang bad shna mynta da u motdur uba kham jrong namar la shna naduh syngkai, ka kti kaba bat ïa ka ryntieh, ka spong ha khlieh bad u paila ba la deng ha shadem.
Nalor nangta, u la ïathuh ba ynda la buh ïa u mot jong u Tirot Sing yn buh ruh ïa ki kot lyngkdop kaba la buh lang ki dur ban batai ha ka ktien Khasi bad Bengalee.
Shuh shuh u la batai ba ha ki dur la pyni ba ha ka 4 tarik Ïaïong 1829, ki phareng ki la shet kylla ïa ka Hima Nongkhlaw namar ki la thombor ïa ka imlang ka sahlang bad dei hangne ba u Tirot Sing u la sdang ban bitar ban sdang ka jingïakhun thma.
