Shillong, K’lyngkot 30
U Myntri ka tnat Revenue & Excise, Bah Kyrmen Shylla, ha ka Sngi Ba-ar u la pyntip ba ka tnat shen kan sa pyntreikam noh da ki kor kompiwtor ban buh jingthoh bad jingkheiñ khnang ban don jingtip lada don ka jinglait ei ka khajna na ka kam khaïi kyiad.
U Bah Kyrmen u la ong ba ka tnat Revenue ka la wad ïa kane ka lad ka lynti ban tehlakam noh ïa ka jinglait ei ka khajna khamtam ha ka kam khaïi kyaid, bad lyngba ka jingpyntreikam da ki kor kompiwtor yn lah ban buh jingthoh ïa ka jinglum khajna na ka kam ïadie ïathied kyaid bad mynta dang ap sa ka jingmynjur jong ka kynhun Myntri halor kane ka jingthmu.
“Ïa mynta hi ngim pat don kano-kano ka jingthoh kaba kdew ïa ka jinglait ei ka khajna, kumta ka jingpyntreikam da ki kor kompiwtor kan ailad ïa ngi ban tip lada don ka jinglait ei ka khajna nalor kan ai ïa ka jingkheiñ kaba shai halor ka jingïoh lum khajna,” la ong u Myntri.
U Bah Kyrmen u la kdew ïa ka jingdonkam halor ka jingïarap song pisa bad lada ka wan khlem kano-kano ka jingeh, ka jingpyntreikam ïa kane ka sienjam kan long kaba ïaid beit ïaid ryntih, shisien ba la ïoh jingmynjur na ka kynhun Myntri.
Haba kylli halor ka rai jong ka Sorkar ban ithuh noh da ka aiñ ïa ka waiñ ba shna hi, u Myntri u la ong ba kane ka dei ka sienjam kaba biang palat bad ka la ïarap bha ruh ïa kiba bun ki nongshna waiñ hapoh ka Jylla.
U la ong, “Ngin sa pyrshang ban pynurlong lada donkam ïa ka jingkyrshan. Ka thong jong ngi ka long ban long ka nongshalan waiñ ba heh duh hapoh India. Ka Sorkar kan ailad katba mon ïa ki briew kiba kwah ban shna waiñ bad na ka liang jong ngi, ngi lah ban ai sha ki da ka license bad ki kot ki sla ba donkam”.
