Jowai, K’lyngkot 30
Ka Jaiñtia Hills Development Society (JHDS) ryngkat ka jingïatreilang bad ka shlem treikam District Social Welfare Officer, West Jaiñtia Hills, ha ka 30 tarik Kyllalyngkot ka la pynlong ïa ka prokram ai jingpynshai (awareness program) ba shisngi halor ka phang “Prevention of Women from Domestic Violence”.
Ïa kane ka prokram ai jingpynshai la pynlong ha ka shnong Lumtrep Nongjngi ha ka jingïashim bynta jong 63 ngut ki longkmie, longkpa bad kiwei. Ka jingthmu jong kane ka jingïalang ka long ban pynshai kumno ban lah ban pynduna ïa ka jingshah lehbeiñ jong ki kynthei. Ïa ka jingïalang la pynïaid da u Field Program Associate ka JHDS u Bah Francis Langlein bad la ïoh ka jingkren maitphang na u Coordinator ka JHDS u Bah Denis Kurkalang.
La ïoh ki jingkren jingbatai halor ka phang na ki ophisar jong ki tnat treikam sorkar bapher bapher kiba kynthup ïa u District Child Protection Officer u Bah S Passah, Center Manager cum Protection Officer jong ka One-stop Center ka Kong Lucy Ksoo, u Officer in-charge ka thanad Nartiang D Lamare, Officer in-charge Women Police Station Jowai Kong Ibashisha Kharpran bad ka Kong D Suchiang, Advocate District Legal Service Authority.
Baroh ki nongkren ki la batai shai halor ki lad ki lynti bad khanglad ïa ka jingkynrei kine ki kam sniew bad ruh ïa ki lad ki lynti ba lah ban ïoh jingïarap na ki shlem treikam sorkar. Ha kane ka sngi ka la don ruh ka jingïalehkai drama lyngkot da ki samla pule Intern ka Martin Luther Christian University.
