Tura, K’Lyngkot:
Ka A’chik National Youth Organization (ANYO) ka la pynpaw ka jingsngewkhia halor ka mat ba ïadei bad ka jingshim kabu be-aiñ bad jingkhaïi tuh ïa ki jingdon-jingem mariang na Ri-lum Garo da ki kynhun bapher-bapher ki bym ithuh satia, nalor ba kine ki kam be-aiñ ki ju jia ha ka por mynsngi hakhmat jong ki tnad treikam ba dei khmih kiba la bynshet kam ban pynneh ïa kine kijuh.
Ka seng ka la pynsngew ïa kane ha ka Lah Sngi U Blei sha u Deputy Commissioner ka West Garo Hills, u Jagadish Chelani.
“Ki trok bad ki ‘pick-up’ ki ju kit dieng, shyiap, siej nalor kiwei-kiwei ha ka por mynsngi. Ki nongshong shnong ka thaiñ ki la buh jingkylli halor kane, ha ryngkat ka jingsynran lang ki NGO ha kaba la lap ba kim biang kot biang sla. Ïa kine baroh la ju khaïi tuh sha shiliang khappud sha Bangladesh,” ong ka seng ha ka jingujor ba la phah sha u Deputy Commissioner.
Ka seng ka la kam ruh ba ïa katei ka kam be-aiñ la synran ha ryngkat ka jingdonlang ki karkhana ot dieng be-aiñ bad ba shi por, jaka tih maw bad ki karkhana siej kiba treikam khlem ka jingpeitngor.
Ha kajuh ka por, ka la pynsngew ruh ïa ka mat ba ïadei bad ka jingkhaïi masi be-aiñ sha Bangladesh kumjuh ka jingtih dewïong be-aiñ bad ka jingshalan kaba ju jia man ka sngi.
Haba maham ba ka seng kan ym shong kli kti katba kine ki kam be-aiñ ki dang ïai jia, ka seng ka la dawa ïa ka jubab na ka tnad pulit bad tnad khlaw, ba kin ai ka jingkyrshan sha ki Nokma, Village Development & Defense Committee haba wan jia kiba kum kitei ki jingjia kumjuh ban pynshitom pyrshah ïa ki runar ba donkti ha kitei ki kam.
