Shillong, K’Lyngkot 30
Ka Seng Khasi Kmie lyngba ka Lum Sohpet bneng Committee ka la ïaid shakhmat halor ka jingpynkhreh ïa ka ‘Kiew Pyneh Rngiew’ kaba 25 sien, kaba ha kane ka kynti kaba mynta kan long ha ka 4 tarik u Rymphang, 2024.
Kumta haba ïadei bad kane ka ‘Kiew Pyneh Rngiew’ kaba 25, ka Lum Sohpetbneng Committee ka kwah ba kan ïa sam bad ban pathai lem ïa ka khubor sha u paid Khasi baïar ka Bri u Hynñiewtrep Hynñiew-skum Hynñiaw Wasa ïa ki jingbthah, ki jingpynbeit bad ruh ïa ki adong-adit, khnang ba ka ‘Kiew Eh Rngiew’ paidbah ha katei ka sngi kan da long kaba ïaid beit kaba ïaid ryntih.
Haba ïakren bad u Rgh D.L. Nongbri, Vice-President ka Seng Khasi Kmie bad u dkhot jong ka Lum Sohpetbeng Committee, u pyntip ba ka nguh ka dem na khyrdop u Lum Sohpetbneng kan sdang naduh dang step phyrngap, kaba hangne ka jingshah ïa ki kali ban kiew arted lynti sha u lum ba kyntang yn khang haduh ka por 11 baje mynstep, katba ki paidbah kiba kwah ban mih noh pat hadien ba la dep ka nguh ka dem ka kiew pyneh rngiew kan dei naduh ka por 1 baje nohphai sngi.
Nalor kata, u Rgh D.L Nongbri u ai ruh ïa kane ka jingbthah ba kito kiba wan na ki thaiñ ka Ri-lum Pnar kin wan lyngba ka surokbah Shillong Bye Pass, katba kiba wan na ki thaiñ jong ka Ri-Khasi Sepngi kum na ki thaiñ Mairang, Nongstoiñ namar ka jingkhim bad maramot ïa ka jingkieng ka Damsite, lada long kaba lah kin sngewbha ban wan na ki thaiñ jong ka UCC Lad Umsaw.
Haba ïadei bad ki jaka ban pynïeng ïa ki kali, u Rgh D.L. Nongbri u pyntip ba ha kane ka kynti kaba mynta la pynkhreh janai ïa kane bad kyntu ïa ki para-kur para-kha ba kin sngewbha ba kin ïatreilang ryngkat bad ki nongïarap kam da kaba kin ngeit bad kohnguh ïa ka jingbthah ïa ki ban pynïeng ïa ki kali ha ki jaka kiba la dep ban pynkhreh.
Shuh shuh ha kane ka kynti kaba mynta, ka Lum Sohpetbneng Committee ka la dep ba kan shna kyrpang ruh ïa ki basa ïa ki briew kiba wan ban ïadie sha die dud, ha kaba ka la kyntu ruh ïa baroh ba kin da ïakynduh bad kynjoh ktien ïa ki dkhot ka komiti, lait nangta yn ym shah pat ïano-ïano ruh ban shna basa ne sher dara ha ki rud surok ne lynti ïaid jong ki paidbah bad lada don kiba leh pyrshah ka komiti ka la rai ba kan weng beit ïa ki.
Ka jingkyntu ka long ruh ba ki paidbah kiba leit kiew Pyneh Rngiew ha kane ka sngi ba kin kiar ha kaba sliew ne thang ding, ban ri bad sumar kyndong ïa ki sawdong sawkun ban ym bret pathar ïa ki song jingbam.
Haba ïadei bad ka jingsam ïa u khaw eh u khaw khien bad kumjuh ïa ka um ksiar ka um rupa, mynta ka kynti ka la don ka jingpynbeit kaba kyrpang khamtam lei-lei ha ka por ban kiew ha duwan ban nguh ban dem, ba la kyntu bad kyrpad ïa baroh ba kin bud bad ngeit ïa ki kyndon bad jingbthah jong ki nongpynïaid.
