Shillong, K’lyngkot 30
U Myntri ka tnat pule puthi, u Rakkam A Sangma, u la ong ba ka long kaba donkam ba hap pyndonkam beit da ki kot pule ba la batai da ka Meghalaya Board of School Education (MBoSE) naduh u snem 2025, hynrei sa tang mynta u snem ki dang lah ban pyndonkam da ki kot pule lajong.
Kane ka la wan ruh hadien ba ka Jylla ka la rai ban pdiang ïa ki kot pule katkum ka NCERT ha kaba ka MBoSE kan leh ïa kata.
Hynrei une u Myntri u la ong ba ki don pat ki skul kiba dang kyrpad ban pyndonkam shwa da ki kot pule lajong bad u la ïathuh ba la ïohpdiang ruh ïa ka jingthoh na ka Catholic Schools Association kaba kyrpad ban shah shwa ban pyndonkam da ki kot pule lajong.
U la ong ba yn don ka Committee ka ban khmih bniah ïa kane ha kaba ki riewshemphang kin ai jingmut lang ban ïoh ïa ki lynnong kot pule kiba biang bad ïahap.
U Rakkam u la ong ruh ba ïa ka sobjek English bad Mathematics ka kot pule katkum ka NCERT yn sa ïoh naduh ka 5 tarik haduh 10 tarik u Rymphang bad ïa ka kot pule Science NCERT lah ban ïoh ha ka taïew ban wan.
