Shillong, K’lyngkot 30
U President ka Mairang Block Congress Committee, Bah Resin Nongsiej kaba hap ha Eastern West Khasi Hills District, u la pyntip ba ka Congress kan sei beit ïa u kyrtong uba biang pura bha ban ïakhun ïa ka ilekshon MDC na Mairang konstitwensi hadien ba u MDC ba mynta u Bah Batskhem Ryntathiang u la leit ban pynïasoh sha ka seng NPP.
U Bah Resin u la ïathuh ba ka seng kam sngewlyngngoh shuh ïa ka jingphet seng u Bah Batskhem namar mar shu jop ïa ka ilekshon MDC u la phet sha ka seng HSPDP hynrei shwa ka ilekshon MLA ha u snem 2023 haba ka la don ka jingïapynbeit u la ïakhun biang ïa ka ilekshon na ka seng Congress.
“Ka jingrem jong u tang khyndiat ‘vote’ ka lah ban dei ba ki ‘riew rangbah ki la thait ïa ka jingphet seng une u MDC hynrei lada u ïai neh kumba long lem kiwei ki MDC khlem artatien ban jop beit ïa ka ilekshon MLA” u la ong.”
U la batai ruh ba shwa ka ilekshon MLA ka la don ka khubor ba u MDC Mairang un ïakhun noh na ka seng NPP, hynrei namar ba ki nongkyrshan ki dang bun kiba don ha ka seng Congress dei na kane ka daw u sa neh ha ka Congress, hynrei mynta ka kynti ka jingkwah rung jong u sha ka NPP ka la urlong noh mynshem taïew.
“Wat la u Bah Batskhem u la rung sha ka NPP hynrei ki paidbah kin nym khih kin don beit ha ka seng Congress namar kane ka la jia teng ha ki snem ba la leit bad mynta ruh kan jia ïa u Bah Batskhem namar ki paidbah kin jied beit ïa u kyrtong ba la pynïeng da ka seng Congress” u la ong.
U Bah Resin u la batai biang ba ka jingkhlaiñ ka seng Congress ha Mairang ka dei namar ki la don ki thied kiba khlaiñ bad kiba skhem ki bym khih lano-lano ruh hynrei kin kyrshan beit ïa ka seng Congress.
U la ïathuh ruh ba ïa u kyrtong u ban ïakhun ïa ka ilekshon MDC ka seng kan sa sei madan ynda la pynbna ïa ka tarik thep ‘vote’ katba ïa mynta yn dang buhrieh shwa.
