Shillong, K’Lyngkot 30
Ka Khasi Students’ Union (KSU) ka la ong ba ka jingkren u Myntri Sorkar Pdeng ban pyntreikam ïa ka Citizenship Amendment Act (CAA) ha kylleng ka ri hapoh ki 7 sngi ban wan ka lah ban dei ka buit namarba la jan ka ilekshon.
U Myntri Sorkar Pdeng, u Shantanu Thakur u la kam ba ïa ka CAA yn pyntreikam ha kylleng ka India hapoh ki 7 sngi ban wan. U Thakur u la ong ïa kane ha ka ktien Bengali haba ai jingkren ha ka jingïalang paidbah ha Kakdwip South 24 Parganas ha Bengal.
“Imat ka lah ban dei ka buit jong ki ba la jan ka ilekshon. Ngim lah ban sngewthuh ïa ka jingmut jong ki. U briew uba kren ïa kane un sngewthuh kham bha,” la ong u President ka KSU, samla Lambokstarwell Marngar haba kren halor katei ka bynta.
U samla Marngar u la ong ba ka seng ïa ka CAA naduh ba ka dang dei ka CAB ka la ïeng pyrshah namar ka sngewthuh shai ïa ka jingma ka ban wan, ym tang hapoh ka Jylla hynrei ha ka Thaiñ Shatei Lam Mihngi baroh kawei haba ïadei bad ka jingwan jong ki poiwir.
“Kane ka long ka umsaw ka ban pynjah ïa ka jinglong kyrpang jong ki trai-ri bad kumta ka KSU bad ka NESO ki pyrshah jur ïa kane,” u la ong.
U la pynkynmaw ruh ba ha ka por ba ka Sorkar ka la ïalam ban ïakynduh ïa u Myntri ka tnad kam pohïing ka Sorkar Pdeng, u Amit Shah, ka seng ka la pynpaw ïa ka jingbym kwah ïa ka CAA hynrei ka la ban jur halor ka jingpyntreikam ïa ka Inner Line Permit (ILP) hapoh ka Jylla.
Ha kajuh ka por, haba pynsngew ba ka ïingdorbar thawaiñ ka Jylla ka la mynjur ïa ka rai ban kyrpad ïa ka Sorkar India ban pyntreikam ïa ka ILP hapoh ka Jylla naduh u snem 2019, ha kawei ka liang u la pynpaw ka jinglyngngoh ba ka Sorkar India haduh mynta ka dang pule sah ïa katei ka bynta.
U la ong ruh ba wat la ka Sorkar India ka kdew shai ba ki Jylla kiba don ILP bad hap hapoh ka Khyrnit ba 6 kin lait na ka CAA, hynrei ym baroh ki jaka hapoh ka Jylla ki shah kynthup hapoh ka Khyrnit ba 6.
“I kumba ki pyrshang ai khublei da ka kti ka mon bad tynrah pat da ka diang,” u la ong.
Kumta utei u nongïalam u ong ba ka seng ka ban jur ïa ka Sorkar India ban pyntreikam noh ïa ka ILP hapoh ka Jylla bad kyrmen skhem ba ka Sorkar Jylla kan ym shong ne sngap ha ka ban shah ïa ki poiwir ban wan shapoh ka Jylla.
“Ka KSU kan peitngor namar kam kwah ba ki shongei kin kylla nongshong shnong ba pura ka Jylla. Mynta ka jingma ka wan na ki briew ba nabar bad ka ktah ruh ïa ka khaïi-pateng ki trai-ri, lada kane ka bteng, kan sa poi ka por ba kin sa knieh ruh ïa ka bor synshar,” u la ong.
Haba kdew ïa ka jingshah ñion ki trai-ri ha ki heh paid, u President u la ong ba dei halor kane ka nongrim ba ka seng ka kren sha ka Sorkar India ban ai ka jingïada na bynta ka jinglong kyrpang hynrei kumba ka long mynta i kumba ka kwah pynmadan pynban.
Shuh shuh u samla Marngar u la bynrap ba ka jingdawa jong ka seng ka long katkum ka Riti Synshar ka Ri bad kam shym la long shabar jong ka.
