Shillong, K’lyngkot 30
U Myntri ka tnat pule puthi ka Jylla, u Rakkam A Sangma u la ïathuh ba ka Jylla kan ïoh lai tylli ki Centre na ka bynta ki samla kiba thoh ïa ka eksamin Common University Entrance Test (CUET). Na ka liang une u Myntri u la phah wan ruh ïa ka VPP ba un batai haba ïadei bad kane ka mat kaba ka Sorkar Jylla ka la dep shim khia.
Haba kren sha ki lad pathai khubor, u Rakkam u la ong ba ma u hi dalade u la dep ïakren lyngba ka phone bad u DG ka National Testing Agency (NTA), New Delhi uba la pyntip ba yn buh lai tylli ki Centre CUET ha Meghalaya, kawei ha Tura bad ar tylli ha Shillong.
Hynrei u Rakkam u la ong ba ka shong ruh katkum ka jingbun ki samla kiba pynrung kyrteng, lah ruh ban buh shuh ïa ki Centre.
U Rakkam u la jubab ruh halor ka jingkynnoh ka Voice of the People Party (VPP) kaba la ong ba ka Sorkar Jylla kam shym la leh ei ei ban pynbeit ïa ka jingeh ki samla kiba dei ban thoh ïa ka eksamin CUET.
Hynrei une u Myntri u la ong ba ka VPP ka dei ban ïakynduh ïa u khnang ban ïoh pynshai haba ïadei bad kane ka mat ym ban shu kynnoh pynheh nia.
U la ong ba lehse kane ka dei ka buit jong ki katto katne ki ‘riew saiñpyrthei kiba pyndonkam ïa kane ka buit namarba ki leh ei ei ban ïoh burom namarba ki antad ba ka kam kan sa urlong.
U la ong ruh ba ka dei ka kamram bad jingkitkhlieh ka Sorkar bad ka tnat pule puthi ban shim ki lad ban pynbeit ïa ki jingeh ki samla pule.
U Rakkam u la kyntu ruh ïa ki samla ba kin trei shitom ban pass ïa ka eksamin CUET namarba u ïoh jingtip na u Vice Chancellor ka NEHU ba bun ki jaka ba dang thylli ban leit pule namarba duna kiba pass ïa ka eksamin CUET.
Kumta u la ong ba lada donkam, ka Sorkar kan buh ruh ïa ka jinghikai hynrei kumba ka long mynta ki jaka pule ruh ki long kiba biang ban ïarap ïa ki samla ba kin pynkhreh ïa kum kane ka eksamin.
