Shillong, K’Lyngkot 30
Ki Mahila Morcha jong ka Bharatiya Janata Party (BJP) na ki jylla ka thaiñ Shatei Lam-Mihngi, mynta ki dang leit sha kylleng ki bynta bad district jong ka Meghalaya ban shim jingkheiñ lut halor ki skhim jong ka Sorkar Kmie ba la wanrah da u Myntri Rangbahduh ka ri u Narendra Modi.
Kane ka jingleit kylleng ki district jong ka Mahila Morcha ka BJP, ka dei lyngba ka jingbthah jong ka National President ka BJP Mahila Morcha ka Vanathi Srinivasan. Ka jingthmu jong kane ka long ban ïoh ïa ka jingtip kaba bniah ïa ka jingdon jong ki nongshong shnong kiba la ïoh jingmyntoi na ki skhim ka sorkar kmie ba la wanrah da u Modi.
Ha kane ka jingleit kylleng ki district, ïa ka State BJP Mahila Morcha la lamkhmat da ka President Kong Susuki Pariat, na ka Sikkim BJP Mahila Morcha la lamkhmat da ka President ka Srijana Thapa Chhetri bad na Nagaland BJP Mahila Morcha la lamkhmat da ka Shanbeni Yanthan. Kine ki nongïalam BJP Mahila Morcha ki la ïoh ban pynlong jingïalang bad ki nongtrei ASHA, ki nongtrei Anaganwadi, ki Self Help Groups bad kiwei ki nongïoh jingmyntoi na ki skhim ka sorkar kmie.
Ha ka jingleit jngoh ïa ka Jowai Civil Hospital, ki longkmie ka BJP ki la sngewlung mynsiem shi katdei eh halor ka jingpynpaw jingsngewnguh jong ki nongpang kiba bun ïa u Myntri Rangbahduh u Narendra Modi. Ki la bteng ban banjur halor ka skhim Ayushman, ka skhim ba la wanrah da u Narendra Modi kaba la long shisha ka jingkyrkhu na ka bynta kito ki bym lah ban siew ïa ka jingsiew kaba heh ha ki jaka ai jingsumar. Kane ka kynhun ka la leit ruh ban jngoh ïa ka Wapung Skur Higher Secondary School, St. Joseph’s Parish bad Shillong Cathedral. Kumba ka long mynta, kane ka kynhun ka dang leit kylleng ki bynta jong ka East Khasi Hills, West Khasi Hills, East Jaiñtia Hills, West Jaiñtia Hills bad ruh sha rilum Garo bad ki jaka kiba dang sah jong ka jylla, kin sa pyndep ha kine ki sngi ban wan.
