Mairang, K’Lyngkot 30
Ka Village Defence Party (VDP) jong ka shnong Nongkasen ha Eastern West Khasi Hills ka la maham jur ïa kino-kino ki briew kiba leh ïa kam tuh kam thiem ha ki jaka bapher bapher bad kam pat ba ki dei na ka shnong Nongkasen wat la kim shim la dei na katei ka shnong.
Ha ka kyrwoh khubor, ka VDP Nongkasen ka la pynpaw ba katei ka jingmaham ka dei hadien ba ha kine ki khyndiat sngi la don uwei u briew uba la shah bat namar ka jingleh tuh ha ka jingïakob khwai dohkha ha ka shnong Polsora hynrei une u briew u la kam ïalade ba u dei na ka shnong Nongkasen wat la um shym la dei satia hynrei uba dei pat na ka shnong Mawliwai.
Shuh shuh la ong ruh ba halor kane ka bynta, ka VDP Nongkasen bad ki nongshong shnong, ki la khot ïa utei u briew ban pynshai paidbah halor ka jingkam ka jong u ïalade ba u dei na ka shnong Nongkasen.
Ka VDP Nongkasen ka la pynpaw ruh ba katei ka jingleh jong u Aiborlang Wahlang ka la pynthohbria ïa ka shnong Nongkasen baroh kawei.
La ïathuh ruh ba ha katei ka jingkhot ban pynshai paidbah, ka VDP ka la tian bishar ruh ïa u bad ki la dawa ba u dei ban phla paidbah bad ban pan map halor ka jingkam jong u khlem nongrim kaba la buh dak sniew ruh ïa ka shnong Nongkasen.
Namar kata, ka shnong Nongkasen ruh ka la maham tyngeh ba nangne shakhmat lada dang don biang kum kine briew kiba pynthohbria ïa ka shnong ka thaw, ka shnong kan leh da kaba tyngeh katkum ka aiñ shnong bad wat lada poi ruh ha ki bor ka aiñ.
