Shillong K’lyngkot 30
Ar tylli ki surok, kawei na Umroi bad kawei pat na Madan Nonglakhiat ki long kiba donkam bha na ka bynta ki kali ba kin pyndonkam ban ïaid khnang ban poi sha Shillong bad kumjuh ïa ki kali kiba mih na Shillong ban leit sha thaiñ Ri Bhoi bad Guwahati, ynda la khang shipor ïa ka jing-kieng ha Pung Umïam.
Ka jingkieng ha Pung Umïam ka dei ka jingpynïasoh kaba kongsan tam ïa ki kali kiba ju ïaid lyngba ka surokbah Shillong – Guwahati.
Ban tip ïa ka jinglong jingman jong kine ki surok baroh ar tylli, U Nongsaiñ Hima u la leit lyngba kine ki surok bad kumba long mynta, ki long kiba khim bha bad kine baroh ar tylli ki surok ki ïakynduh ha Mawsiatkhnam bad ïaid lyngba ka shnong Nongkohlew sha Mawtawar bad poi sha Shillong.
Ki kali kiba leit sha Guwahati ne thaiñ Ri Bhoi bad kiba wan kiew sha Shillong kin pyndonkam ïa kawei na kine ki surok kiba lad na Shillong Bypass.
Ki kali na thaiñ Bhoirymbong lehse kin kham suk bad kham jan lada ïaid lyngba ka surok Madan Nonglakhiat kaba mih sha Mawsiatkhnam na bynta ban poi sha Shillong.
Hynrei kiba bun ki kali naduh ki Tourist taksi kin pyndonkam ïa ka surok kaba lad na Umroi najan ka Kad Liengsuiñ bad kane ka surok ka ïaid lyngba ka shnong Umrynjah bad ka poi sha Mawsiatkhnam, ter ter sha Mawtawar bad sha Shillong.
U Rangbah Shnong ka Madan Nonglakhiat u Bah R. Thangkhiew u la ong ba na ka liang ka shnong kam khang ïa ki kali ban ïaid hynrei lada dang shna ïa ka surok lehse kan long ka jingwit lada ïaid ki kali khlem sangeh.
U la ong ba ka jingmaramot ïa ka jingkieng ha Pung Umïam ka dei ban long ka jingshngaiñ bad haba donkam ban pynphai ïa ki kali sha kiwei pat ki surok donkam ban shah ïa ki kali ba kin ïaid na ki surok shnong kum na Madan Nonglakhiat.
Kaei kaba kiba bun ki nongshong shnong ki pynpaw ka long ka jingartatien ba ki trok kin nym lah ban ïaid lyngba kine ki surok kiba khim khamtam ki trok kiba kit mar bad kham heh.
Na ka liang u Myntri ka tnat bording u AT Mondal ruh u la ong ba ïa ka por ban khang shipor ïa ki kali ban ïaid lyngba ka jingkieng ha Pung Umïam yn sa pyntip ynda la ïoh jingtip bniah na ka kompani kaba dei ban pyntrei ïa ka kam bad ïa ki jingtip lah ban ïoh haduh ka 15 tarik u Rymphang.
Hadien kane yn sa tip katno sngi yn khang ïaid kali lyngba ka jingkieng ha Pung Umïam kaba dei ruh ka surokbah bad kan sa don ka jingïakynduh lang hapdeng ki tnat kiba dei khmih lem bad ki bor district na Ri Bhoi bad East Khasi Hills.
U Mondal u la ong ba ki trok kiba kit jingkit khia lei lei kin nym lah ban ïaid lyngba kine ki surok kiba khim bad bun ki trok ki leit lyngba ka thaiñ Diengpasoh bad kiwei kiwei ki surok kiba kham suk ban poi sha Shillong.
