Shillong, K’Lyngkot 30
U Superintendent of Police (City) jong ka jylla, u Bah Vivek Syiem ha u kyrwoh khubor ba la pynmih paidbah ha ka 30 tarik u Kyllalyngkot, u la pyntip ba ka la don ka kompani thok kaba pyndonkam ïa ka kyrteng jong ka ‘Numgenius AI’ da kaba ai ruh ïa ka ‘link’ sha ki paidbah ha kaba kin ñion ha katei ka ‘link’ kaba long https://numgenius-ai.vsisk.com kaba la saphriang bha mynta hapoh ka jylla.
Katei ka kompani thok ka la pynbiej bad pynngop ïa ki paidbah ha ka rukom ban kynshew pisa bad kin ïoh pat ïa ka nong bad ka sut ha ka por kaba lyngkot.
Kum kine ki jingjia ki la ju jia teng hapoh ka East Khasi Hills District ha ki taïew kiba lah dep bad ka jingtohkit ha kaba ïadei bad kane ka dang ïaid shakhmat na ka bynta ban ïoh kem ïa ki briew kiba donkti ban leh ïa kane ka kam thok bad ka kam shukor.
U SP u la pyntip ruh ba ïa ki jingtip shaphang kane ka kompani la pynsaphriang ha ki Whatsapp Group kaba pynbiej ïa ki paidbah ban pynïasoh bad ka.
Shuh shuh la ong ruh ba kane ka ‘Numgenius AI’ ka pynbiej ïa ki paidbah da kaba pyni ïa ki jingïoh kiba lah ban ïoh manla ka sngi ha ki kynta, ki taïew, ki bnai bad kumta ter-ter na ka bynta ban pynngop ïa ki nongkynshew hapoh kane ka kompani bad shisien ba la ïoh ïa ka pisa, kitei ki riewshukor ki jah noh khlem kino-kino ki jingpyntip bad ha kajuh ka por ki la pynkylla kyrteng ïa ki kompani tang ban pynngop ïa ki paidbah ban kynshew pisa.
Namar kata, na ka liang SP u la kyntu ïa ki paidbah ba kin ym ngop bad biej ha ki jingshah pynthame ha kiba kum kitei ki jait kompani thok bad ba ki paidbah kin pyntip wut-wut sha ki pulit da kaba phone ha u nombar jong ka Cyber Crime uba long: 1930 lane sha ka Police Control Room, Shillong uba long: 0364-2215427 lane 6009196479 na ka bynta ki jingïarap.
