Shillong, K’Lyngkot:
Ka Seng Khasi Kmie lyngba ka Lum Sohpetbneng Committee ryngkat ka Komiti u Tymmen u San hapoh ka jingïalam u Chairman u Rgh Skor Jala ki la lah ban pyndep ïa ki lai tylli bynta jong ka nguh ka dem ka dwai ka phirat bad ka kñia ka khriam, ïa kaba la ju tip ïa ka kum ka lehniam ka ‘Shi Hat Shi Taïew’ shwa jong ka kiew Eh Rngiew sha u Lum Sohpetbneng ka ban long ha ka 4 tarik u Rymphang 2024.
Haba ïakren bad u Chairman ka Lum Sohpetbneng Committee u Rgh I Sun, u ïathuh ba barabor la shu sdang shwa na Lum Dorbar, Lawnongthroh, ha kaba la ïeng ïa ka khnong ka bishar bad ka ïapan na U Trai Kynrad u Nongbuh Nongthaw bad ha kane ka kynti ka long kaba sngewtynnad ba kiei kiei baroh kata naduh ka nguh ka dem bad ki jingdwai baroh ka beit ka biang bad ïaid ryntih lut.
Hadien ba la dep na Lum Dorbar, la dei pat sa ka bynta kaba ar ban leit sha ka Mei Mawbuh ban pynsum pynsleh ïa ka ban nguh ban dem ryngkat ka jingpyndep ïa ka lehniam kaba long da kawei ka syiar kynthei bad uwei u syiar shynrang, kaba hangne ruh haba khmih ïa ki dak ki shin baroh ki bit ki biang bad u ngeit skhem ba ka kiew Pyneh Rngiew mynta u snem kan long kaba da phuh da phieng.
Hadien ba la pyndep ïa ka lehniam na ka Mei Mawbuh, la dei pat sa ka pali ban kiew sha ka duwan jong u Sohpetbeng, kaba hangne ruh u Riew Tymmen Riew San, ki la leit sha ka shat ka kheiñ ka khnong ka bishar, ban ïa pan hukum na U Blei Trai Kynrad ryngkat na ki ryngkew ki basa ba kumba la buh ïa ka sngi ka ïa, ba ma ki ruh kin da mih paw ki dak ki shin ban pdiang ïa kane ka kiew pyneh ryngiew ba shi sien shi snem u khun bynriew khnang ban ïoh ïa ka ainguh ka aidem ka duwai ka kyrpad ka kyrpon bad la u Blei Trai Kynrad, ba un theh sei ïa ka jingkyrkhu kaba na sha lyndet ka jong u.
Ynda haba la pyndep ïa ka nguh ka dem, la kiew tiap sha ka duwan ka dupat ha kaba la sdang ka pynsum ka pynsleh ban pynkyntang ïa ka duwan ka dupat, kaba long ka bynta kaba kut jong ka sngi bad pynkhreh pat ïa ka jingwan ban ïa kiew paidbah pat sa ha ka 4 tarik ha kaba yn pyndep sa ïa kawei pat ka lehniam kata ka nguh ka dem lang baroh ha kane ka sngi ba kyntang.
