Shillong, K’Lyngkot 30
Ka Monolith Festival kaba la buh sngi ban pynlong ha ki tarik basdang jong u Rymphang, hynrei na ka liang jong ka Khasi Hills Autonomous District Council (KHADC) ka la pynkynriah bad rah noh ban pynlong sha ka 22 tarik jong ujuh u bnai.
Ïa kane ka tamasa ba la ju pynlong ha Khasi Heritage Village, Mawphlang, ha ka jingshisha la buh ban pynlong ha ka 1 tarik haduh 3 tarik u Rymphang, hynrei namar ki kam kiba bun la pynkynriah noh sha ka 22 tarik.
Haba pyntip ïa kane, u Deputy CEM ka KHADC u Bah Pynshngaiñ N Syiem u la ong ba ka jinghap ban shim rai ban pynkynriah tarik noh ïa kane ka tamasa da ka council namar ka jingbun kam ban pynkhreh pynkhrum ha kane ka jaka bad kumta yn pynlong noh ïa kane ka tamasa ha ka 22, 23 bad 24 tarik u Rymphang.
“Ka daw ba ngi la pynkynriah ïa ka tamasa ka dei namar ka jingwan ba dang shen jong ka President ha Mawphlang kaba la pynbunkam ha ka jingpynkhreh ïa ka jingwan ka jong ka bad ha kajuh ka por namar ka jingkhriat palat ka suiñ bneng,” ong u Bah PN Syiem.
U Bah Pynshngaiñ u la pyntip ruh ba ïa kane ka tamasa yn sa wan ban plie da u Symbud Myntri Rangbah ka jylla u Bah Prestone Tynsong ha ka 22 tarik bad yn pynhap pyrda pat ïa ka tamasa da u Myntri Rangbah ka jylla u Conrad K Sangma ha ka 24 tarik u Rymphang.
Haba kylli, u Bah Pynshngaiñ u la ong ba kane ka tamasa mynta ka kynti kan long kaba khampher na ki snem kiba la leit, ha kaba mynta ka KHADC ka la ïatreilang bad ka tnat Jngohkai ka jylla bad ka Meghalayan Age Limited bad la thung ruh ïa ka kynhun Rocski kum ki nongpynïaid ne ki Event Management jong ka tamasa.
