Shillong, K’Lyngkot 30
Ha kawei ka jingjia ha East Jaiñtia Hills, ka la don ka jingkynnoh ba uwei u briew u la shah pynïap ha ki runar ki bym pat tip ki dei kiei.
Na ka khubor jong ki pulit, la ïathuh ba u Salam Dkhar u la ujor ba ha ka 28 tarik Kyllalyngkot ha ka por kumba 6 baje mynstep, u para jong u, u B Dkhar, u la shah pynïap ha kawei ka shnong ïa kaba la tip kyrteng kum ka Pamkshaid, Mukhian. Hynrei ym shym la pyntip mano kita kiba la donkti ban shim ïa ka jingim jong u para jong u.
Ha kawei pat ka jingjia, ka Shar Phalyngki ka la ujor ba ha ka 26 tarik Kyllalyngkot ha ka por kumba 7 baje janmiet, u la don uwei u briew uba la thombor da ka tari ïa u khun jong ka, u Rimio Phalyngki, 31 snem ka rta, ha ka ïing sah jong ki kaba don ha ka shnong Nartiang, West Jaiñtia Hills. Ïa u Rimio la pynkit noh sha Civil Hospital, Jowai ban ïoh ïa ka jingsumar.
Nalorkata, sa ha kawei pat ka jingjia, ki nongshong shnong ka shnong Jalaphet Bri-Sumer ha East Jaiñtia Hills ki la pyntip sha ki pulit ba ha ka 24 tarik Kyllalyngkot, ki la lap ïa ka metïap jong uwei u briew ba la tip kyrteng kum u Sirajul Islam, 28 snem ka rta, na kawei ka wah rit ha Khohrasong, Jalaphet Bri-Sutnga. La suba ba u Islam u la shah pynïap ha ki briew ki bym lah ban tip ki dei kiei.
Ha kawei pat ka jingjia, u Timon Lyngdoh, Security Guard jong ka NECCON Power & Infra Ltd, u la ujor ba ha ka 25 tarik Kyllalyngkot, ki runar kiba la shong da kawei ka kali Maruti Car ki la wan rung sha ka shlem jong ka NECCON Power & Infra Ltd, ha Sutnga, East Jaiñtia Hills, bad ki la tuh ïa 36 tylli ki Battery kiba shongdor kumba T. 6.48 lak.
Sa ha kawei pat ka jingjia, ka Dr. Aishwarya M ka la ujor ba ha ka 24 tarik Kyllalyngkot, ki runar ki la leit prong ïa ka ïing sah jong ka ha Mawpat Wahheh bad ki la tuh ïa ki jingdeng.
Nalorkata, uwei u nongshong shnong ka Jhalupara, u la ujor ba ha ka 16 tarik Risaw, 2023, u la phah pisa T. 43,000 sha ka ‘Varsha Hygienic Machineries’ lyngba ka RTGS/NEFT, kum ka jingsiew ban thied ïa ki tiar ki tar. Pynban kat haduh mynta kita ki tiar ki tar ki khlem pat poi satia sha u.
Ha kawei pat ka jingjia, u Biswajit Das u la ujor ba ha ka miet jong ka 26 tarik Kyllalyngkot, ki runar ki la leit prong ïa ka dukan jong u ha Chibinang Bazar, West Garo Hills, bad ki la tuh ïa hynriew tylli ki Mobile Phone bad kiwei ki mar ki mata.
