Shillong, K’Lyngkot 30 (UNI)
U Myntri Rangbah ka Jylla, Conrad K. Sangma, ha ka Sngi Ba-ar u la pynbna ba ka Sorkar jong u kan pynlut kumba T.400 klur ha kine ki 3 snem ban wan na bynta ban thaw ïa ki jaka pynlang um ha kylleng ka Jylla.
Haba ai jingkren ha ka sngi ba plie ïa ka Mawrah Multi-Purpose Water Reservoir, East Khasi Hills District, u Sangma u la ong ba ka jingpynneh ïa ki tyllong um bad ka jingthaw ïa ki jaka pynlang um ki long ki mat ba hakhmat jong ka Sorkar.
Haba kdew ba tang 4-5% ka um slap la lah ban pynlang da ka Jylla bad kaba bun ka leit sha ki Jylla bad Ri ba marjan, u Myntri Rangbah u la ong, “Kumta dei tang ka jingthaw ïa ki jaka pynlang um ka lynti ban pynneh ïa ka um slap.”
U la ong ba ka Mawrah Multi-Purpose Water Reservoir kan long ruh kum ka projek ha kiba bun ki liang, ban kyntiew ïa ki kam jngoh kai, kam ri dohkha bad ka rep ka riang.
U Sangma u la bynrap ba ka surok kaba 25 km na Sohra sha Khongtong yn sa siang rong hapoh jong ka skhim PMGSY, bad la khmih lynti ban pyndep ïa ka kam hapoh u Kyllalyngkot 2025.
“Kane ka surok ym tang ba kan long ka jingkyrkhu sha ki nongshong shnong ka thaiñ hynrei kan kyntiew shi kat dei ïa ki kam jngoh kai,” u la ong.
Na bynta ka Mawrah Multipurpose Reservoir Project, ki kam ki la sdang naduh u Ïaïong, 2021 ha ka jinglut kaba T.1.50 klur lyngba ka jingbei tyngka na ka NABARD-RIDF XXVI, FY 2021-22.
“Hadien kane, la ïoh pdiang ruh ïa kiwei-kiwei ki jingïarap pisa na ka State Plan bad Meghalayan Age Limited na bynta ban shna ïa ka jingkieng ïaid kjat halor jong ka dam, ki surok, lynti ïaid kjat lem bad kiwei-kiwei,” ong ka kyrwoh.
Ka um kaba la pynlang ha katei ka jaka ka long kumba 7.7 hektar haduh 8.0 hektar (19-20 akar), bad kaba jylliew tam ka long 10.50 mitar. Ka lah ban pynlang 5,28,000 cubic mitar, ne 528 million litar, kaba lah ban bsa ïa ka jingdonkam um jong katto-katne ki shnong, ong ka kyrwoh.
“Ïa mynta, la ri dohkha ha kane ka jaka bad ka ju khring ruh ïa ki sim. La khmih lynti ba kane ka jaka pynlang um kan long ka jingmyntoi ka ban long ka lad ai kam ai jam ïa ki nongshong shnong,” la ong ka kyrwoh.
