New Delhi, K’Lyngkot 30
Ka Kalpana Soren kaba dei ka kurim jong u Hemant Soren, Myntri Rangbah ka jylla Jharkhand, ka lah ban shimti ïa kane ka shuki lada u Soren u shah kem ha ki bor jong ka Enforcement Directorate, la kam ki lad pathai khubor ka Ri ha ka miet Sngi Ba-Ar.
Kitei ki lad pathai khubor ki la ong ba katkum ki tyllong khubor na ka seng jong u Soren, ka Jharkhand Mukti Morcha (JMM), ka Kalpana ka lah ban long ka Myntri Rangbah bathymmai ha ka jaka jong u kurim jong ka.
U Soren un sa shah tohkit ha ka Enforcement Directorate ha ka Sngi Balang ha kaba ïadei bad ka jingleh klop ïa ka kam kaba ïadei bad ki jaka puta jong ka sorkar. Ki khubor ki ïathuh ba u Soren u lah ban shah kem hadien ba la dep ka jingtohkit pyrshah ïa u.
Shuh shuh kitei ki lad pathai khubor ki la ïathuh ba u Soren u la pynbna ba ka kurim jong u kan shimti kum ka Myntri Rangbah ha ka jingïalang jong ki MLA ka Liang Synshar kaba la long mynta ka janmiet. La ong ruh ba ki MLA ki la mynjur ïa kane ka jingai jingmut jong u Soren namar ki sngew ba ka sorkar ka dei ban neh ha kane ka khyllipmat.
Ka jingshah tohkit jong u Soren ka long halor ka jingbamsap bamngem ha kaba ïadei bad ka jingdie ïa ki jaka ki puta ba shongdor T. 600 klur. La kynnoh ba la pynkylla ïa ka jinglong trai jong ki jaka sorkar, bad hadien kata, la die noh sha ki kompani kiba tei ïing.
Na ka liang ka Enforcement Directorate haduh mynta ka la kem ïa 14 ngut ki briew ha kaba ïadei bad katei ka jingtohkit. Na ka liang u Soren u la kam ba kane ka jingtohkit ka dei ka jingsylla kaba shyrkhei pyrshah ïa u bad ïa ka sorkar ba u ïalam.
