Shillong, K’lyngkot 31
Ka jingbym ïoh ïa ka bording ilektrik ka la kylla long ka daw jong ka jingsuki bad sahteng ban pyntrei ïa ki katto- katne tylli ki projek hapoh ka Jal Jeevan Mission (JJM) ha Jaiñtia bad East Khasi Hills district.
Ïa kane la ïathuh da u Myntri ka tnat Public Health Engineering (PHE) u Marcuise N Marak uba la batai ba ka jingbym lah ban ïoh bording ka la ktah ïa ki katto-katne ki projek JJM namarba kham bun ki projek ha Jaiñtia bad Khasi Hills ki dei kiba hap ban shu tan um lyngba ka bording ilektrik ban pynpoi um sha ki longïing.
U Marak u la ïathuh ba kumba 73.69 na ka 100 la dep pynpoi um sha ki longïing ha kaba baroh ki ïing ki don 6.51 lak tylli hapoh ka JJM bad ka thong ka long ban pynpoi um lut 100 na ka 100 hapoh u Lber mynta u 2024.
Ha ka jingshisha, u la ong ba ka bording ilektrik kaba tan na ka bynta kine ki projek ka dei kaba la dep siew hynrei ka jingbym pat ïoh bording ka dei namarba kham jngai ka jaka ban tan bording.
Kumta la bthah ïa ki ophisar ka PHE ban ïakren bad ka MeECL bad na ka liang jong u ruh un ïakren bad u Myntri Rangbah.
