Shillong, K’Lyngkot 31
Ka Sorkar India ka la rai ban wanrah syndon da ka aiñ ka ban teh lakam halor ka jingleh thok bad jingbym ïaid beit ki eksamin bapher-bapher.
Ïa kane la pynbna da ka President jong ka Ri, ka Droupadi Murmu ha ka Sngi Balang ha ka por ba ka la plie ïa ka Dorbar Mang Tyngka jong ka Parliament.
Na ka liang ka Murmu ka la ong ba ka sorkar ka don jingtip halor ka jinglynga jingpisa jong ki samla ha kaba ïadei bad ka jingleh thok bad jingbym ïaid beit ki eksamin bapher-bapher. “Namarkata, la dep ban rai ban wanrah bad pyntreikam da ka aiñ ban ïakhun tyngeh pyrshah ïa kine ki jingleh thok bad jingbym biang,” la ong ka Murmu.
Lah ban kdew ba ha u snem ba la lah, la hap ban pynsangeh ïa ki eksamin kum ka jingpynrung kam nonghikai ha Rajasthan, Common Eligibility Test (CET) na ka bynta ki kam Group-D ha Haryana, jingpynrung kam ‘junior clerk’ ha Gujarat bad jingpynrung kam pulit ha Bihar bad kiwei na ka daw jong ka jinglait tuh jong ki jingkylli hashwa ban long kine ki eksamin.
Ha kane ka jingkren, ka President ka la kren ruh halor kiba bun ki mat ki jura bad khamtam ki kam ba ka sorkar ka la leh ha kine ki 10 snem ba la lah.
