Shillong, K’Lyngkot 31
Ka kynhun ka BJP ba kynthup ïa ki President Mahila Morcha jong ka Meghalaya, Sikkim, Nagaland lem bad kiwei-kiwei ki Jylla ka Thaiñ Shatei Lam Mihngi ki la ïakynduh bad pynkup burom ïa ka nongïoh pdiang khusnam ‘Padmashree’, Kong Silbi Passah ha ïingsah jong ka.
Ha kane ka sngi la synran lang ruh da u nongaiktien ba hakhlieh ka BJP ha ka Jylla, Bah Mariahom Kharkrang, bad State Vice-President, Gagan Jain lem bad kiwei-kiwei ki dkhot jong ka seng.
Kane ka jingithuh kaba la pynkup burom ïa ka Kong Passah, ka long sa kawei ka jingbynrap sha ka thup ba jrong jong kiba bun ki khusnam kiba la pynkup ïa ki ‘riewdon sap ha ka rwai ka siaw bad ka put ka tem tynrai kiba napoh ka Jylla.
Ha ka jingïaid lynti ba bun-bun snem jong ka, kane ka nongrwai ka la ïoh pdiang ruh ïa ka khusnam Sangeet Natak Akademi Award, Indian Chamber of Commerce for Affirmative Action Front- Liners Award, Prasar Bharati, Meghalaya Day Award – tang ban shu kdew ïa ki katto-katne tylli.
Haba ai jingkren ha ka jingïalang, u Bah Kharkrang u la ong, “Lah da ki bun-bun snem mynta, ka Kong Passah ka la khring bad pynshoh biej ïa ki paidbah da ki sur tynrai bathiang bad ba pynum mynsiem. Hynrei, dei tang ka Sorkar u Myntri Rangbahduh, Narendra Modi kaba la ithuh ïa ka jingnoh synñiang bakhraw jong ka da kaba pynkup burom da ka khusnam ‘Padmashree’. Kane ka jingïoh pdiang haba khatduh ka sei madan ïa ka jingriewspah jong ngi ha ka liang ka rwai ka siaw, ka put ka tem sha ka ri bad ka long ruh ka dak jingkdew ba tang ka Sorkar BJP kaba lah ban ai ïa ka Meghalaya ïa ka jingithuh jong ka.”
Na ka liang ka State-President ka BJP Mahila Morcha, Kong Susuki Pariat haba ai jingïaroh ka la ong, “Ka Kong Silbi Passah ka long ka jingsarong ïa ka Thaiñ Shatei Lam Mihngi baroh kawei. Nga ai khublei ïa ka Sorkar u Modi kaba la ithuh ïa ka jingminot jong ka kynthei ‘riewlum na Meghalaya bad ithuh ruh ïa ki kam bakhraw jong ka na bynta ka imlang-sahlang jong ngi. Hato kawei pat ka Sorkar kan pynkup burom ïa ka da ka ‘Padmashree’, ngan lyngngoh! Kane ka jingleh ka Sorkar Pdeng ka long sa kawei ka sakhi jong ka ‘mantra’ u Modi – ‘sabka saath, sabka vikaas, sabka biswas’, kynthup lang ïa baroh, wanrah ka roi ka par na bynta baroh, bad jop ïa ka jingshaniah jong baroh.”
Kane ka long ka kyrwoh na u nongaiktien ba hakhlieh ka BJP-Meghalaya, Bah Mariahom Kharkrang.
