Nongstoiñ, K’Lyngkot 31
Ka kyrtong MP jong ka seng NPP, Kong Ampareen Lyngdoh kaba dei ruh ka Myntri Sorkar ka la ong ba ka la dei ka por ïa ka Shillong Parliamentary Konstitwensi ba kan jied noh ïa ki kyrtong kiba don ha ka liang synshar (ruling party) ban kham ïohi ïa kata ka jingkyrmen kaba bha ïa kaba u MP lane ka MP ki donkam ba kin leh.
Ïa kane la pynpaw da ka Kong Ampareen Lyngdoh haba kren ha ka jingïalang ha Nongstoiñ kaba la long ha kine ki khyndait sngi ba la dep.
Ka Kong Ampareen ka la pynpaw ruh da kaba ong, “Nga la ïohi ïa ka jingrung seng thymmai jong ki nongïalam bapher bapher ki da dei shisha ki sngi kiba U Blei U la kyrkhu ïa ka longrynïeng ka jong nga ba ngan ïoh ïuhkjat ha ki thaiñ sa shisien ym kum ka Myntri kaba peit ïa ki tnat treikam hynrei ruh kum kata ka kyrtong ba ka seng ka la bynshet ban long kum ka kyrtong MP na ka bynta ka seng NPP.”
Shuh shuh ka la pynpaw ruh ïa ka jingsngewnguh ïa u Bah Macmillan Byrsat uba long u MLA barim ka Nongstoiñ uba la synran ïa ka ha ka lynti ïaid ka jong ka kaba dang thymmai.
“Ka long kaba biang ïa nga kum ka briew ka nongshong shnong ka Jylla ban ïeng rangbah ban skhem bad ban shlur ban ong ïa ka seng ngan lum ngan lang ma nga ïa kita ki nongkyrshan jong ka NPP ba kin ïa tylli lang kawei ha ki 36 tylli ki konstitwensi ban pynjop ïa ka NPP ha ka ilekshon MP,” la ong ka Kong Ampareen.
Ka la bynrap ruh, “Kaba nga kwah ban ong ïa baroh ki nongshong shnong ba kin leit ban pynsawa lem sha ki dong bad ki shnong wat wad tang ïa ki nongkyrshan jong ka NPP wad lem ïa ki nongkyrshan jong kiwei kiwei ki seng kiba kwah ïa kata ka lad ban jied ïa ka kyrtong MP kaba lehse kan wanlam ïa ki jingmyntoi sha ki dong bad ki shnong ki jong ki.”
Shuh shuh ka la ong ruh ba halor kita ki nongrim ka ju kylli ïalade ha kine ki khyndiat taïew naduh ba la long ka kyrtong MP, kaei tharai ba kan leh ban pynpher ïa ka jinglong MP jong ka ne lada phin pynjop ban long MP ban hun lang baroh 36 tylli ki konstitwensi.
“Kaba nyngkong ka long ngan wad bniah ïa ki jinglong ki jingman jong ki dong ki shnong, ngan khmih ïa ki nongïalam shnong, nongïalam seng, ïa ki nongïalam shimet, ka niam bapher bapher ban ïaleh ban pynïatylli ïa ki, ba kin don lang ha kawei ka jingmut ba ka MP ka dei ban wanlam ïa katto-katne ki lad ki kabu ksiar ban pynkiew ïa ki shnong ki thaw,” la ong ka Kong Ampareen da kaba bynrap ba lada ka lah ban leh ïa kata, tharai ka jingkhot ka seng kan wan urlong.
Kaba ar, ka Kong Ampareen ka la ong kaei ka kamram jong ka kum ka kyrtong MP ka NPP, kaba nyngkong eh ban pyni sha ki paidbah ba ma ka, ka don ha ka seng kaba nym phiah ïa ki paidbah la ha ka niam bad ka jingngeit bapher bapher kaba ki don.
Ka la ong ruh sa kawei de kaba ka sngew donkam ban leh, bunsien namar ba don tang 12 ngut ki MLA kiba lah ban long ki dkhot jong ka kynhun Myntri lane ban don ha ka shuki Mynti, kiwei ki MLA baroh ki shait sngew marwei, ki shait sngew iehnoh, ki shait sngew bym don ba sngap ïa ki jingud ki jingnam ki jong ki. Lada ka lah ma ka kum ka MP ban lum ban lang ïa baroh ki 36 ngut MLA ban pynsngew ïa ki ba kan long ka ksiang na ka bynta ki jingdawa ki jong ki la hapoh ka jylla ne shathie sha ka sorkar kmie bad lada ka lah, lehse kan long ka MP kaba jop ha ka jingtreikam.
“Ha kine ki lai tylli ki samoi ba la dep, ka long kaba sngewsih ba ki MP ki dei na kawei ka seng, ka sorkar ka dei na kiwei ka jingïasynrop lang ki seng bad kam don ka jingïatrei ryngkat-ryngkat, kam don ka jingïasngewthuh ha kawei ka rynsan bad lada phi ailad ïa nga ba ngan jop ha kane ka ilekshon MP, nga tharai hangta ruh nga don ka bynta jong nga kum ka MP ban trei ban rah ïa ki jingdawa, ki jingdonkam ba ka Jylla ka jong ngi ka la rah sha ka sorkar kmie bad khlem lah ban buddien ïa ki kam kiba bun,” la ong ka Kong Ampareen.
