Shillong, K’Lyngkot 31
U Myntri Rangbah ka Jylla, Conrad K Sangma, u la ong ba ka jingkhang jong ka Sorkar ka plie bad ka long kaba kloi ban ïakren bad ka VPP ha kano-kano ka por halor ka jingdawa ban thung kam biang ïa lai ngut ki ophisar ka Meghalaya Lokayukta.
U Myntri Rangbah u la ong, ba mano-mano ruh ki lah ban wan ïakren bad ka Sorkar ha kano-kano ka por naba kane ka sorkar ka long shisha kaba plie ka jingkhang bad kaba kloi ban ïakren.
Lah ban pynkynmaw ba ka seng VPP ka la pynlong ïa ka jingïakhih bad mih sha surok ban dawa thung kam biang ïa lai ngut ki ophisar ka Lokayukta kiba la shah weng kam noh ha u bnai Nohprah jong u snem ba la dep.
Hynrei hadien ka jingïakren bad ka Myntri ka tnat aiñ ka Kong Ampareen Lyngdoh kaba la ai ka jingkular ba na ka liang jong u Myntri Rangbah u long uba kloi ban ïakynduh bad ïakren, ka VPP ka la weng noh shipor ïa ka jingïakhih.
