Shillong, K’Lyngkot 31
U Myntri Rangbah ka Jylla, Conrad K Sangma, ha ka Sngi Balang u la kyntu ïa ka seng kieng atiar ka Hynñiewtrep National Liberation Council (HNLC) ba kan bteng ïa ka jingïakren ïasuk bad ka Sorkar.
Haba kren sha ki nongthoh khubor, u Myntri Rangbah u la ong, ka kam ba ïadei bad ka jingmap noh ïa ki kam bymman jong ki dkhot ka HNLC, ka dei kaba la ïakren halor ka jinglong jong kawei pa kawei ka case.
U la ong ruh ba ka jingweng noh ïa ki case pyrshah ïa ki nongïalam bad dkhot ka seng HNLC kan shong ha ka rukom long jong kawei pa kawei ka case.
Lah ban pynkynmaw ba ka HNLC ka la weng noh ïalade na ka jingïakren ïasuk bad ka Sorkar ha ka taïew ba nyngkong jong u bnai Kyllalyngkot da kaba kynnoh ba ka sorkar kam shym la shim khia ïa ki mat jingdawa ka jong ki.
U Conrad u la ong, “Ki don katto-katne ki case kiba shyrkhei bha. Kumta yn sa peit bad bishar bniah kawei hadien kawei hynrei kane kam mut pat ban shim ba ka dei ka hukum ba salonsar ba ong ba la weng noh ïa baroh ki case bad kan shong na kawei ka case sha kawei pat.”
Haba ban jur halor ki kyndon ïakren ïasuk, u Conrad u la ong ba ki don da ki kyndon ba ju buh ha man ki jingïakren bad kumta, lada ka Sorkar ka pynkylla ïa kine ki kyndon ïa katto-katne ki kynhun, kane kan buh jingeh ban wanrah ïa ka rynsan bad kumjuh ïa kiwei pat ki kynhun.
Haba kylli, u la ong ba ka Sorkar ka dang ïohi tang ïa ka shithi na ka HNLC ba phah ktien ïa ka rai ban nym bteng shuh ïa ka jingïakren ïasuk bad kumta ka sorkar ka kyrpad ïa ka HNLC ban khmih ba kin don beit ki jingtynjuh, kin mih beit kiei-kiei ki bym lah ban ïapynbeit bad khatduh hi ka jingangnud ka long ban ïoh ïa ka jingsuk.
