Shillong, K’Lyngkot 31
Hadien hynriew sngi ka jingwad ba khlem shongthait, ki nongshong shnong ka Umlympung 12 Mer, Mylliem ki la lap ïa ka metïap jong u samla Wadjingshai Kharkongor (23 snem ka rta) na phud Wah Umlympung.
Kane ka wah ka dei kaba tuid sha Wah Umïew ha katei hi ka shnong bad la lap ïa ka met utei u samla ha ka por mynsngi jong ka Sngi Balang.
Kumban shu pynkynmaw, une u samla u la jah na la ïing naduh ka 26 tarik mynta u bnai ha ka por kumba 9 baje mynstep.
Ïa ka met ba dang sah jong une u samla, la shimti noh da ki pulit kiba la pynkit sha NEIGRIHMS na bynta ban leh ïa ka ‘Post Mortem’.
