Shillong, K’Lyngkot 31
Katkum ka khubor na ki pulit, ha ka 29 tarik Kyllalyngkot ha ka por kumba 7:30 janmiet, uwei u briew ïa uba la tip kyrteng kum u Kyrshan Syiemlieh, 20 snem ka rta, u la shoh ïa u Baïaiskhem Basarngaid, 19 snem ka rta, ha Lumshyiap Nongmensong, bad la hap ban kit ïa une uba shah shoh sha Shillong Civil Hospital. Hynrei utei uba la shah kynnoh ba u la shoh ïa u Baïaiskhem u la phet rieh haduh mynta.
Ha kawei pat ka jingjia, u K Poktai u la ujor ba ha ka 9 tarik Kyllalyngkot katba u dang shong da ka bos MTC (ML-03-0237) bad hadien ba u la poi ha ISBT Mawïong, u la shem ba ka pla jong u kaba don ïa ki kot ki sla bakongsan ka la jah rngai.
Nalorkata, ki pulit ki la ong ba u Vinod Starji Kharnaïor u la ujor ba ha ka 22 tarik Kyllalyngkot ha ka por kumba 8 baje mynstep, ki runar ki la prong ïa ka dukan jong u kaba don ha Nongshilliang Block-IV, Shillong bad ki la tuh ïa ki marbam ba shongdor kumba T. 25,000/-.
Ha kawei pat ka jingjia, u Rahul Naga u la ujor ba ha ka 7 tarik Kyllalyngkot, 2023, kawei ka trok (AS-01DC-5724) ba la ñiah da u Dil Bh Chettri ka la mih na ka shlem jong ka Gold Stone Cement Ltd., Musiang Lamare (East Jaiñtia Hills) ryngkat 500 byrni ka dewbilat ban pynpoi sha Gold Stone Cement Ltd., Jorabat. Hynrei, la ujor ba kane ka trok ka khlem poi satia sha ka jaka ba ka dei ban leit.
Ki pulit ki la pyntip ruh ba u SDE (CM) BSNL Jowai u la ujor ba ha ka 29 tarik Kyllalyngkot ha ka por kumba 12:15 mynsngi, ki runar ki la tuh ïa 12 tylli ki Battery Cell ryngkat bad kiwei ki mar kiba shongdor T. 86,528/- na Nangbah BSNL BTS.
Shuh shuh ki pulit ki la ai jingtip ba kawei ka longkmie ka la ujor ba u kurim jong ka u la iehnoh ïa ka naduh u snem 2023 hadien ba la kynnoh ba u la don jingïadei bad kawei pat ka kynthei, bad u la shim ruh T. 6 lak na ka ïing sah jong ka ha West Garo Hills.
Ha kawei pat ka jingjia, u Sanjay M Sangma u la ujor ba ha ka 25 tarik Kyllalyngkot, kiba shipara bad u, kata, u Ranjith M Sangma bad ka Simtila M Sangma, ki la shoh la dat ïa u ha ka ïing sah jong u ha Tikrikilla, West Garo Hills. Kham hadien, la ong ruh ba u Ranjith M Sangma u la shim noh ïa ka thuk-thuk jong u (ML-08D-8211) ryngkat bad kawei ka Mobile Phone.
Nalorkata, ki pulit ki la ai jingtip ba u Salsrang D Sangma u la ujor ba ha ka 29 tarik Kyllalyngkot ha ka por kumba 2 baje mynsngi, u la lap ba ka thuk-thuk jong u (ML-08K-0024) ka la jah na ka jaka ba la pynïeng ha Photamati (West Garo Hills).
